Comezamos a Semana Santa co paso dunha fronte fría asociada a unha borrasca no suroeste de Irlanda que deixará na xornada de hoxe, luns, ceos cubertos con chuvascos en toda Galicia. Ao avanzar a tarde, hai probabiblidades de que os chuvascos vaian acompañados de compoñente eléctrica, o que podería afectar negativamente á procesión do Cristo das Caídas
Este luns, as temperaturas mínimas manteranse en valores suaves con 16º, mentres que as máximas minguarán levemente.
Martes e mércores estarán marcados por ceos con nubes e claros, agardándose precipitacións para o mércores sensibles de ir acompañadas de aparato eléctrico pola noite, coincidindo coas procesións da Santísima Virxe da Soidade e Xesús Nazareno coa Cruz a Costas o mércores ás 21:00 horas.
As temperaturas mínimas descenderán notablemente, pasando de luns a martes de 16 a 9º, manténdose en torno a eses valores no resto da semana. No caso das máximas, oscilarán entre os 18 e os 21º.
Para o xoves e venres agárdase moita inestabilidade atmosférica, con altas probabilidades de precipitacións tormentosas, segundo as predicións de Meteogalicia, que tamén poderían afectar ás esperadas procesións dos Pasos, do Encontro e do Santo Enterro, programadas para o xoves ás 20:00 e o venres ás 09:30 e as 20:00 horas, respectivamente.
A partir da fin de semana, a situación meteorolóxica estabilizarase, cunha caída na probabilidade de precipitación e a un lixeiro aumento das temperaturas, que serán as normais para a época e que permitirán o desfrute das últimas procesións da Semana Santa.