Chega unha nova receita de "A cociña gourmet en conserva" cunha proposta de Conservas Pescamar que nos trae os sabores da cociña tradicional e un dos moluscos máis prezados das nosas rías: a zamburiña.
A zamburiña é moi estimada na cociña polo seu sabor e textura. A estas características únense os seus valores nutricionais, entre os que destaca a súa alta achega en proteínas de gran valor biolóxico.
Para preparar unha deliciosa Empanada zamburiñas en salsa de vieira Pescamar necesitamos os seguintes ingredientes:
► Para a masa
- 500 gr. de fariña
- 1/2 dl. de auga
- 1/2 dl. de aceite de oliva virxe extra
- Fermento prensado
- Sal
► Para o recheo
- 2 latas de zamburiñas das rías en salsa de vieira con aceite de oliva
- 10 langostinos
- 1 cebola
- 1 dente de allo
- 1 pemento verde
- 1 pemento vermello
- 2 tomates
- 1 ovo
- Sal
Preparación:
► Masa
Facemos un volcán de fariña sobre unha superficie lisa e poñemos no centro o aceite de oliva, o sal e un pouco de fermento prensado disolto en auga morna.
Traballamos a mestura cos dedos ata obter unha masa homoxénea e, a continuación, deixámola tapada nun lugar temperado uns 20 minutos para que fermente.
► Recheo
Lavamos, pelamos e picamos en dados todos os ingredientes vexetais (cebola, allo, pementos e tomates, previamente escaldados e pelados).
Refogamos no aceite quente a cebola, o allo, os pementos e os tomates. Engadimos os langostinos pelados e cortados en anacos. Sazonamos e deixamos cocer de 10 a 12 minutos ata que se consuma case completamente o líquido da cocción. Reservamos.
► Empanada
Dividimos en dúas a masa e estiramos unha metade con axuda dun rodete con forma cadrada. Colocamos esta masa nunha fonte de forno e dispoñemos enriba unha capa coas hortalizas salteadas e os langostinos que reservaramos. Por riba, repartimos as zamburiñas das rías en salsa de vieira con aceite de oliva e a salsa de vieira en cantidade ao gusto.
Estarricamos de igual maneira o resto da masa e cubrimos ben a empanada. Recortamos os bordos sobrantes e reservámolos.
Unimos ben os bordos e picamos a superficie varias veces con axuda dun garfo.
Aproveitamos os recortes reservados para decorar a superficie e pintamos con ovo batido.
Prequentamos o forno a 180 graos, colocamos a empanada na bandexa central e deixamos uns 45 minutos aproximadamente (dependendo da potencia do forno).
Sacamos a empanada cando a súa superficie estea dourada.
En dúas semanas volvemos cunha nova proposta de "A cociña gourmet en conserva" cos produtos do mar de alta calidade de Conservas Pescamar.