A ONG Ecoloxistas en Acción publicou este mércores a listaxe completa das 48 praias españolas, dúas por provincia, ás que asigna unha 'bandeira negra' por contaminación e mala xestión ambiental.
Un ano máis desde 2005, e despois dunha nova inspección dos máis de 8.000 quilómetros do litoral, a organización denuncia os casos máis significativos, aínda que advirte que "no son los únicos, sino los más graves y visibles". "Hay muchísimo que mejorar", advertiu a súa portavoz, Claudia Asensi.
Ecoloxistas en Acción explicou que nesta edición fíxose especial fincapé nos "problemas sociais e ambientais provocados pola turistificación e a urbanización do litoral", e tamén incidiu noutro "grave problema ambiental" que sofre o litoral español é a "alta concentración de plásticos".
Na provincia de Pontevedra, as bandeiras negras de Ecoloxistas en Acción son "por contaminación" para o Concello de Cangas e a UTE Xestión Cangas "polos contínuos vertidos á Ría de Aldán e a deficiente xestión das augas fecais e pluviais".
A bandeira negra "por mala xestión" é para a Xunta de Galicia "por promover industria contaminante, Altri e Ence, que afecta as rías de Arousa e á ría de Pontevedra".
Segundo Ecoloxistas en Acción "a Xunta de Galicia está a promover, ou polo menos facilitando, novos proxectos industriais (macrocelulosa de Altri-Greenfiber, a beiras do río Ulla, en Palas de Rei) ou ampliación de existentes (factoría de celulosa de ENCE, a beiras da ría de Pontevedra, na cidade de Pontevedra), que son altamente contaminantes e que afectarán gravemente aos ecosistemas que conforman as rías de Arousa e Pontevedra. As Rías Baixas levan décadas sufrindo un dévalo produtivo do marisqueo e a pesca debido á contaminación industrial".
Tras a publicación do Informe Bandeiras Negras 2024 Ence reitera que o proxecto que ten en marcha na fábrica de Lourizán "non supón, en ningún caso, unha ampliación da mesma nin un aumento da súa produción" e insiste en que "seguimos e seguiremos comprometidos co coidado do medioambiente, coa biodiversidade e co respecto aos nosos veciños".