Dúas persoas visiblemente alteradas entraron a última hora da tarde deste mércores 18 na droguería perfumería Muchas, situada na rúa Loureiro Crespo.
Unha vez dentro comezaron a furtar perfumes e outros cosméticos, segundo relataban a PontevedraViva testemuñas presenciais.
Minutos máis tarde chegaban patrullas da Policía Nacional e da Policía Local ao céntrico establecemento. Nese momento, cando os axentes tentaba identificalos, un dos individuos comezou a chorar, a berrar e mesmo a desprazarse polo chan.
O alboroto provocou que numerosas persoas que circulaban pola rúa achegásense ata o escaparate do establecemento alertadas polos berros e os saloucos. Portaba unha mochila cargada de latas de cervexa, segundo distintas fontes, e pedía aos policías que lle deran unha aperta.
Finalmente, axentes da Policía Nacional trasladaban o home a comisaría, mentres que o outro mozo era unicamente identificado.