Saíron de Siria fuxindo da interminable guerra e ante o recrutamento obrigatorio ao que estaban abocados a maioría e refuxiáronse no buque Lady Boss no que durante o últimos tres meses realizaron unha ruta marítima que lles chegou a Turquía, Guinea Bissau e España. Esta semana atracaron no porto de Marín e, ante o inminente regreso ao seu país, decidiron pedir o asilo que lles evite volver á devastación.
O Goberno admitiu a trámite a solicitude e xa poden abandonar o barco, pero decidiron non facelo. Quedarán a bordo ata que lles paguen os tres meses de salario que lles deben.
Funcionarios de Estranxeiría da Policía Nacional acudiron ás 11.30 horas deste venres ao porto de Marín para entregar aos sete cidadáns sirios o 'cartón vermello' que lles autoriza a traballar e residir en España de forma temporal, mentres se resolve o seu expediente e se decide se se lle concede ou non o Estatuto de Refuxiado. A entrega formalizouse, pero no momento no que se lle comunicou que a ONG Accem estaba alí para ofrecerlles axuda e podían abandonar o barco, negáronse.
A explicación achegouna Luz Baz, inspectora da Federación Internacional dos Traballadores do Transporte (ITF). Os sete, xunto ao resto da tripulación, levan embarcados tres meses nos que realizaron no buque distintas funcións e, desde setembro, non cobraron o seu salario. Tras as xestións de ITF, o armador do barco realizou unha transferencia a un banco de Marín que cobre polo menos para o salario dos sete demandantes de asilo, pero o problema é que ese diñeiro non poderá entregárselle fisicamente ata o vindeiro luns por un "trámite bancario".
Eles, "por su experiencia desconfían de que vaya a ser cierto", de modo que "hasta que reciban físicamente el dinero, no se quieren ir". Segundo Luz Vaz, coa noticia da admisión a trámite do asilo "ellos están más tranquilos", pero a tranquilidade non lles impide manter a desconfianza e están convencidos de que se abandonan o barco, o diñeiro xa non chegará a eles
Os cidadáns búlgaros que chegaron a Marín no Lady Boss xa abandonaron o barco e, cando estes sete demandantes de asilo se vaian, tan só quedarán os cidadáns sirios que optaron por seguir traballando, de modo que a empresa armadora tivo que buscar traballadores a todo présa para poder irse de Marín e seguir a súa ruta cara a Cartaxena e, despois Turquía. Xa os conseguiron, pero agora non poderán irse ata o luns. O buque, mentres tanto, cambiou de peirao dentro das instalacións portuarias.
Este venres tamén acudiron o porto de Marín tres traballadoras e un usuario da ONG Accem que exerce de intérprete. Segundo explicou unha das técnicas, Cristina Ucieda, chegaron para ofrecerlles entrar no programa de acollida que financia o Ministerio de Emprego e Seguridade Social e que realizan en España tres asociacións, en Galicia só eles.
O Ministerio de Interior leva a súa solicitude de asilo, pero Accem ofreceralle, en paralelo, apoio durante os seis meses que teñen unha autorización temporal para poder residir en España e durante o tempo necesario para que a súa solicitude siga adiante. O cartón vermello irase renovando cada seis meses mentres esperan o seu Estatuto de Refuxiado ou a súa denegación e ofreceranlles aloxamento, manutención, asistencia sanitaria e apoio a nivel xurídico, psicolóxico ou laboral.
A asociación ten a súa sede na Coruña, pero non necesariamente quedarán aquí, senón que poden ser derivados a calquera localidade de España na que haxa prazas en acollida.