A Policía Nacional culminou unha investigación que permite esclarecer unha serie de roubos con forza rexistrados no rural de Marín durante os últimos meses.
Actuaron en seis ocasiones en segundas residencias, galpóns e bares, coa singularidade de que non só se limitaban a roubar, nalgunha das vivendas chegaron a cociñar e celebrar festas.
Por estes feitos, axentes da Policía Nacional de Marín detiveron na mañá do xoves 27 de abril a dous homes como presuntos responsables.
Os axentes levaron a cabo unha investigación laboriosa ao tratarse de roubos en zonas rurais, pouco poboadas e sempre de madrugada.
Os policías estableceron un dispositivo para tratar de identificar os sospeitosos e realizaron un rexistro no domicilio dun dos investigados, nunha coñecida barriada de Marín.
Ese rexistro realizouse o xoves 27 durante a mañá e, ante a falta de colaboración do sospeitoso, os axentes necesitaron usar a forza para acceder ao interior da vivenda.
Neste rexistro localizáronse numerosos efectos subtraídos nos roubos. Son obxectos de moi distinta índole, sobre todo, aveños con boa aceptación no mercado de segunda man como un kaiak ou máquinas cortacéspede.
O caso está en mans do Xulgado de Marín.