A Garda Civil detivo un home de 38 anos acusado de roubar o bote de propinas do interior dun establecemento hostaleiro de Sanxenxo, apropiándose dun botín duns 400 euros.
O detido, segundo informou o instituto armado, tiña xa antecedentes policiais e contaba con dúas ordes de busca e detención en vigor.
Os feitos producíronse a pasada fin de semana cando esta persoa, tras solicitar unha consumición á camareira, aproveitou un descoido para entrar na parte interior do mostrador e coller o bote de propinas do persoal.
Tras facerse co diñeiro, o home fuxiu do bar, pero a descrición da camareira e a investigación da Garda Civil, que estableceu un dispositivo de procura nas inmediacións, permitiron localizalo dentro dun bar próximo.
Unha vez identificado por medios técnicos, xa que carecía de documentación e domicilio coñecido, os axentes comprobaron que existían sobre el dúas ordes de busca e detención -unha delas para o seu ingreso en prisión- emitidas por dous xulgados do País Vasco.
O xulgado de instrución de garda de Cambados, onde foi conducido o detido tras o seu arresto, decretou o seu ingreso en prisión.