Un incendio nunha vivenda situada na parroquia de Padriñán, en Sanxenxo, provocou o desaloxo de seis persoas durante a madrugada deste venres 4, segundo informou o 112 Galicia.
O suceso, que tivo lugar na Rúa dos Cesteiros, causou ademais o traslado dunha muller ao Hospital Montecelo debido á inhalación de fume.
Os feitos ocorreron pouco antes das 03:30 horas, cando un particular alertou ao servizo de emerxencias sobre un lume que se iniciara nun electrodoméstico da cociña.
A chamada advertía da gran cantidade de fume acumulado no interior da vivenda, onde permanecían persoas nese momento.
Persoal do servizo de Emerxencias, segundo informa o Concello de Sanxenxo, accedía ao interior da vivenda para evacuar unha muller que debido ao intenso fume tivo que saír ao balcón.
A outra persoa que se atopaba na vivenda saía polos seus propios medios. A muller foi derivada ao Hospital Montecelo por inhalación de fume. Desaloxaron os outros dous pisos ocupados no bloque por seguridade, Entre os desaloxados figuraban cinco adultos e un menor.
O Centro Integrado de Atención ás Emerxencias activou un operativo no que participaron os Bombeiros de Ribadumia, o Grupo de Emerxencias Supramunicipal (GES) de Sanxenxo, a Garda Civil e a Policía Local.
Os equipos confirmaron que o incendio tiña a súa orixe nun lavalouza, pero que a principal ameaza procedía da densa fumareda xerada.
O Servizo de Urxencias Sanitarias de Galicia-061 tivo que atender no lugar a muller afectada, que presentaba síntomas por inhalación de fume, sendo posteriormente trasladada ao Hospital Montecelo para recibir atención médica.