O 30 de decembro, Ángeles Durán atopou á súa tía morta na cama do seu domicilio. De inmediato, pediu axuda, pero atopouse con que nin o 061 nin a aseguradora Adeslas lla deron, negándose a enviar a alguén á casa para certificar a defunción. Empezaron aí "sete larguísimas horas" que agora derivaron nunha denuncia.
Presentou queixas en Adeslas e en Muface, pois a falecida era mutualista desta entidade, e tamén unha denuncia no Xulgado de Garda de Pontevedra. Ademais, o xulgado ten no seu poder un atestado presentado pola Policía Nacional, que tivo que acudir á vivenda e chamar á forense que acabou certificando o falecemento.
A tía de Ángeles tiña 91 anos e estaba encamada na súa vivenda da Ruibal, na parroquia pontevedresa de Salcedo, pero nada facía prever que fose falecer. Foi "literalmente, dunha hora para outra". Ela vive na casa de á beira e visitábaa constantemente. Ás 17.30 deulle a merenda e "merendou como unha leoa", ás 19.30 horas "estaba a ver a novela" e, cando regresou ás 20.30 horas para preparala para durmir, atopouna morta.
Aí empezou o seu odisea. Relátaa entre a indignación, a incredulidade e as ganas de que isto non se repita nunca máis. "O único que pretendo é que a xente se entere", explica, á vez que mostra as denuncias presentadas o 2 de xaneiro.
O primeiro que fixo foi chamar ao 112, aínda que na central de emerxencias indicáronlle que o procedemento que debían seguir era chamar á aseguradora. Así o fixo, pero en Adeslas "dixéronnos que llamasemos ao 061". Asi fixeron, pero atopáronse con que se pasaban a pelota dun lado ao outro, pois no 061 "dixéronnos que este trámite correspondía a Adeslas".
Chamou por segunda vez a Adeslas e a resposta, segundo relata, foi que "non dispuñan de persoal para acudir ao domicilio". Tras "moitos intentos" infrutuosos de que alguén acudise ao seu domicilio para certificar a defunción, acabaron chamando á Policía Nacional "porque xa non sabiamos que facer".
Desde a Comisaría tentaron axudar primeiro por teléfono e logo dúas patrullas desprazáronse á súa vivenda. Tamén os policías realizaron "moitos intentos a Adeslas e ao 061" ata que, finalmente, acabaron chamando unha forense, que foi a que acudiu ao domicilio e certificou o falecemento.
Esta veciña de Salcedo indica que tan só a Policía Nacional e a forense a axudaron aquela longa noite. "Portáronse moi ben, tentárono todo", asegura, mesmo quedando alí ata que todo se solucionou pasadas o tres da madrugada.
Acompañárona nas súas "sete horas de angustia, incredulidade e desesperación" esperando a que certificasen a morte da súa tía, o tempo que pasou desde a súa primeira chamada ata que finalmente a empresa funeraria puido levar o corpo porque a forense certificou que estaba falecida e era unha morte natural.
Lembra esas horas con "incredulidade". Indica que "non mo podía crer" e que tamén axentes da Policía Nacional lle trasladaron que "nunca viran nada igual". Por iso se animou a denunciar, aínda convencida de que nin Muface nin Adeslas atenderán as súas queixas.
Si ten "esperanza no xulgado" e que, polo menos, esta actuación derive nalgún tipo de sanción.
Ademais, gustaríalle que a situación se coñecese para que o saiban persoas que se atopen na súa mesma situación. "A calquera lle pode pasar na súa casa" e ela mesma pensa na súa sogra, que é tamén mutualista, e teme que, si tamén falece no domicilio, a situación se repita.
Na súa queixa en Adeslas, á que tivo acceso este xornal, denuncia "omisión de servizo e non ir ao domicilio para facer o trámite correspondente" e engade unha queixa anterior.
Tres días antes, o 27 de decembro, chamara para que enviasen un médico ou unha ambulancia a casa da súa tía para atendela por un problema nun dedo e "dinme que non teñen servizo dispoñible nin de médicos nin de ambulancias a fin de semana". Finalmente, chamouna un doutor desde Barcelona e o día 30 sobre as 15.00 horas si acudiu un profesional á casa. Foi cinco horas antes da morte e o que sucedía "non ten nada que ver" coa morte, pero únese ao seu malestar pola actuación da aseguradora.
Na súa queixa en Muface fala de "denigrante situación". A este xornal trasládalle a súa indignación porque "chegado o momento, non es un ser humano, es unha cifra".