Todo o territorio afectado polos dous incendios que, a principios deste mes de agosto, producíronse en Caldas de Reis e Ponte Caldelas, xa é oficialmente 'zona catastrófica'. Así o declarou este martes o Consello de Ministros.
As axudas que recibirán os afectados non serán só para o municipio no que se orixinou o incendio, senón que se estenderán igualmente ao resto de concellos afectados por eses lumes, entre eles Vilagarcía de Arousa e Pontevedra.
O incendio do Xiabre, en Caldas, acabou calcinando unhas 450 hectáreas; mentres que o de Ponte Caldelas, polo monte da Fracha -que afectou tamén os núcleos pontevedreses da Canicouva e Ponte Sampaio-, arrasou outras 380 hectáreas.
Esta figura, que actualmente se denomina zona afectada gravemente por emerxencias de protección civil (ZAEPC), permitirá activar un amplo paquete de medidas que, segundo o delegado do Goberno, José Miñones, "servirá para paliar de forma importante as perdas polos incendios máis grandes da historia da nosa comunidade".
Miñones aludiu á situación "excepcionalmente complicada" rexistrada nos montes este verán e puxo de manifesto a "áxil resposta" do Goberno para atallar o problema e salvagardar, en primeiro lugar, a vida das persoas.
As axudas directas que habilita esta declaración como 'zona catastrófica' inclúen axudas por falecemento ou incapacidade absoluta, destrución total ou parcial da vivenda, danos en aveños domésticos ou indemnizacións a empresas, entre outras.
Ademais, os diferentes ministerios do Goberno poderán contratar as obras necesarias para reparar os danos causados en infraestruturas de titularidade estatal ou conceder axudas por danos en producións agrícolas, gandeiras, forestais e de acuicultura mariña.
Os municipios afectados, pola súa banda, recibirán axudas, por un importe de ata o 50 por cento, aos proxectos que executen para reparar infraestruturas, instalacións e equipamentos municipais que se viron danados por estes incendios.