O Concello de Cuntis acaba de dar a coñecer os establecementos gañadores do II Concurso de Decoración e Iluminación do Nadal posto en marcha co obxectivo de involucrar aos establecementos do municipio na decoración dunhas festas atípicas marcadas pola situación sanitaria provocada pola covid-19 e, ao tempo, animar o ambiente e as compras no comercio de proximidade.
O primeiro premio, valorado en 200 euros a gastar nos establecementos participantes foi para a Fundación Terra Termarum. O segundo premio, valorado en 150 euros recaeu en Gloss Moda, o terceiro premio valorado en 100 euros foi para Salón de Peiteado Lourdes, o cuarto premio de 50 euros foi para Bottino&Tacco e o quinto de tamén 50 euros premio foi para Calzados Mapi.
O xurado estivo formado por Cruz Sande Silva (decoradora de interiores e veciña de Cuntis), Concepción Velasco Aedo (decoradora de interiores e veciña de Cuntis) e María Isabel Eiras Miguéns (publicista e veciña de Cuntis).
A entrega de premios tivo lugar o pasado xoves coa presencia da tenente de alcalde e concelleira, Conchi Campos.
A concelleira destacou a alta participación no certame así como o gran nivel de todos os establecementos participantes, que realizaron un esforzo importante adornando e iluminando o seu escaparate ou as zonas exteriores con motivos de Nadal, de acordo ao establecido nas bases do concurso.