O alcalde de Cerdedo-Cotobade, Jorge Cubela, dirixiu un contundente escrito ao presidente de Abanca, Juan Carlos Escotet, para amosarlle a súa preocupación pola redución paulatina de servizo e presencia desta entidade financeira nos concellos galegos de ámbito rural e lembroulle as orixe e o "apegamento tradicional deste banco ao territorio".
Ao mesmo tempo, o rexedor propón a convocatoria dunha xuntanza de alcaldes afectados pola reducción de entidades financeiras no seu municipio e para elo xa estableceu contacto cos rexedores de Marín, Forcarei e Vilagarcía para "crear unha fronte común que se rebele contra esta decisión empresarial que prexudica seriamente os servizos que reciben os residentes en zonas rurais e, especialmente, ás persoas maiores que son vítimas da fenda tecnolóxica e que se ven privadas dunha atención persoal, como de costume".
"Crear unha fronte común que se rebele contra esta decisión empresarial"
No escrito que Cubela lle remite ao presidente de Abanca convídalle a "reflexionar" sobre a necesidade de "manter e de reformular os servizos bancarios" que se prestan á veciñanza de concellos galegos con predominancia rural como "un xeito de vertebrar o país" e de compromiso coas estratexias que se trazan para "fixar poboación e evitar que a mancha da Galicia baleira aumente".
O alcalde amosouse preocupado pola redución presencial e de atención de Abanca que afecta a 15 oficinas na provincia, entre elas a de Carballedo e que "supoñen un prexuizo moi importante para a clientela de sempre, apegada ao banco e que está moi relacionada con xente maior que non domina as novas tecnoloxías e que precisan dunha atención personalizada. Diminuir estes servizos presenciais vai en detrimento dos dereitos e das posibilidades dos residentes no rural que teñen problemas para se desprazar e que teñen uns modos e costumes moi apegadas ao trato persoal e directo para atender as súas demandas financeiras, crediticias e mesmo aforradoras", indicou o alcalde.
"Tomaremos unha actitude proactiva e de rebeldía ante unha situación inxusta"
"O aumento de comisións, a redución de horarios e a eliminación de oficinas" son comportamentos "preocupantes" para o alcalde de Cerdedo-Cotobade.
Jorge Cubela lembra o chamamento á confianza feito polos directivos de Abanca, tras o proceso de intervención de Novagalicia Banco que rematou coa adquisición por parte de Banesco da entidade pública, para que os impositores non retiraran os seus aforros e confiaran no novo equipo que se facía cargo da entidade.
"Os impositores, os aforradores e os pequenos e medianos empresarios déronlle esa confianza a Escotet e aos directivos da nova entidade bancaria que xurdía das cinzas de Novagalicia Banco e agora imponse a reciprocidade e a corresponsabilidade con eles mantendo abertos uns servizos que son esenciais", di Cubela.
"Entablaremos contactos con outras entidades e non desbotamos nin mobilizacións que exterioricen a nosa disconformidade"
Cubela advírtelle tamén a Escotet que "os concellos non imos quedar parados mirando o que sucede e tomaremos unha actitude proactiva e de rebeldía ante unha situación inxusta. Entablaremos contactos con outras entidades e non desbotamos nin mobilizacións que exterioricen a nosa disconformidade ou mesmo que remate cunha migración masiva de contas municipais e mesmo persoais a outras entidades máis sensibles co feito diferencial do mundo rural galego", asegurou o alcalde.
Jorge Cubela, que xa puxo ao tanto destas circunstacias aos voceiros dos distintos grupos políticos que compoñen a Corporación Municipal de Cerdedo-Cotobade, propón unha xuntanza de concellos afectados para tratar de atallar de maneira coordinada este problema que vai en aumento e se vai xeralizando e que incluso provocou que a administración autonómica abrira unha liña de axudas para garantir, polo menos, a presenza de caixeros automáticos en núcleos de poboación e concellos dos que xa desapareceron oficinas e mesmo dispensadores de cartos en metálico.
"Non desbotamos nada, ningunha medida a tomar, tampouco as protestas na rúa e diante das propias entidades financeiras. Serán os acontecementos, as xuntanzas de coordinación e o que demanden os nosos veciños quen o decida, pero desde logo nós non estamos dispostos a permitir que se ningunee ao mundo rural e que se pechen dunha tacada 15 oficinas na provincia dunha entidade tan significativa e estrutural, que pese a ser unha empresa privada non deixa de ter responsabilidade activa na configuración do armazón financeiro na nosa Comunidade Autónoma", sentenciou Jorge Cubela.