Con motivo do Día Mundial do Xogo, que se celebra cada 28 de maio, Cruz Vermella Pontevedra organizou esta tarde de xoves na Praza de Barcelos unha actividade con xogos tradicionais da que tomaron parte persoas que participan nos diferentes programas que desenvolven a institución e tamén foi invitado o público xeral.
Ademais de xogos tradicionais como a petanca, os aros, a diana ou a buxaina, os asistentes tamén puideron informarse nunha caseta sobre a importancia de xogar. É un elemento fundamental no desenvolvemento infantil, a aprendizaxe e a construción de prácticas cidadás mediante a adquisición de diversas habilidades, ademais de constituír un dereito fundamental de nenos e nenas.
Todas estas actividades realizáronse baixo a colaboración dun equipo de voluntarios e voluntarias de Cruz Vermella.
Por outra banda, o xogo resulta imprescindible para o desenvolvemento de actividades físicas, a estimulación cognitiva ou o esparexemento social. Por estes motivos, animaron a todas as persoas a participar nas actividades.