O subdelegado do Goberno en Pontevedra, Abel Losada, expresou a súa "máxima preocupación" polo atraso da Xunta de Galicia "á hora de tomar medidas" para paliar os efectos que deixou ao seu paso a borrasca Kirk.
Losada lamentou que o goberno galego "quedara de espectador" ante a virulencia deste temporal "limitándose a declarar alertas ou prealertas" a título informativo.
A iso, o subdelegado sumou que tampouco mobilizaron medios propios para atender ás emerxencias que xerou esta borrasca por todo o territorio "deixando a xestión das incidencias" aos concellos e os equipos directivos dos centros educativos.
"Non se pode entender que non se suspendera a actividade docente ou que circulasen os autobuses de transporte regular por unhas estradas que estaban en condicións extremas", asegurou Abel Losada.
Ademais, criticou que o plan de inundacións de Galicia activouse tan só en modo prealerta, en lugar de activar o nivel 2 que é o que implicaría a participación dos medios propios da Xunta para solucionar as emerxencias.
Isto significa, segundo Losada, "deixar aos concellos loitando á intemperie", enfrontándose a inundacións, desprendementos ou caídas de todo tipo de obstáculos nos espazos públicos.
Con respecto ás estradas de titularidade estatal, o subdelegado confirmou que o persoal de mantemento está a traballar "arreo" en condicións "extremadamente perigosas" para acondicionar estes viarios tras o paso da borrasca Kirk.
A estas críticas tamén se sumou o PSdeG-PSOE de Pontevedra, que a través do seu secretario provincial, David Regades, cualificou de "auténtica temeridade" que a Xunta de Galicia non cancelase a xornada escolar e o transporte por estrada.
"É inconcibible a falta de prevención e de xestión do goberno galego a pesar dos avisos e das alertas que estaban anunciadas hai días", sostivo Regades, que lamentou a "total irresponsabilidade" e a "falta de reflexos" da Xunta.
A pesar das "serias advertencias" sobre a virulencia da borrasca Kirk, o líder socialista sinalou que as autoridades educativas foron "incapaces de tomar a decisión correcta" e suspender as clases, provocando que os desprazamentos sexan un "auténtico perigo".
David Regades ve "inconcibible" esta situación e esixiu "explicacións inmediatas" á Xunta ante "tamaña falta de previsión" ante un fenómeno atmosférico "que estaba máis que avisado e que podería causar danos moito maiores".