Xa o advertira Rueda. Cores Tourís ía xogar un papel importante na nova executiva do PP pontevedrés. E así será. O delegado territorial da Xunta en Pontevedra será o secretario xeral dos populares na provincia, a 'man dereita' de Alfonso Rueda na súa futura responsabilidade como presidente do partido en Pontevedra.
El será o encargado da coordinación interna do partido, de facer funcionar a "sala de máquinas" do PP en Pontevedra. Ante tal responsabilidade, Rueda tiña claro que José Manuel Cores Tourís era a persoa indicada para "asistirme directamente", xa que reúne "todos os condicionantes que se esperan dun secretario xeral".
"Coñecemento do partido o ten de sobra e os anos como alcalde e como delegado da Xunta lle dá experiencia no día a día, na política cercana", destacou Alfonso Rueda, que definiu a Cores Tourís como unha persoa "traballadora e leal ao partido" e que conta coa súa "máxima confianza" para que lle acompañe nesta "aventura".
Ademais, o candidato á presidencia do PP pontevedrés avanzou que as cidades de Pontevedra e Vigo terán o seu "peso" na nova executiva provincial, onde tamén haberá unha "boa" representación territorial con persoas con "suficiente experiencia, habilidade e peso político" que coordinarán cada unha das zonas da provincia de Pontevedra.
Unha das últimas accións de Rueda como candidato foi entregar os case 600 avais de compromisarios de fronte ao congreso deste domingo. Son, dixo, de afiliados que durante o último mes mostráronlle o seu "agarimo" e unha "boa acolllida" á súa candidatura, achegando ideas, suxestións e críticas sobre o funcionamento do partido.
"É a constatación de que o PP segue a ser un partido vivo, con moitas ganas de traballar e que representa moi ben á provincia", explicou Alfonso Rueda que espera "non defraudar ás expectativas".