Os socialistas pontevedreses deron, agora si, o pistoletazo de saída á precampaña electoral para as municipais de maio. Fixérono coa presentación oficial do equipo que acompañará ao seu candidato á Alcaldía, Iván Puentes.
Unhas duascentas persoas acudiron ao acto que o PSOE de Pontevedra celebrou na cafetería do Club Naval e que contou cun invitado de excepción, o recentemente nomeado ministro de Sanidade, o galego José Miñones.
Durante a súa intervención, Miñones sinalou que Puentes "é a mellor opción" para gobernar a cidade de Pontevedra, augurando que "o sorpasso xa está aquí" froito do traballo "incansable" dun equipo cheo de "ilusión e proxectos".
"Pontevedra é hoxe máis verde, máis azul e moito máis natural", sostivo o titular de Sanidade, algo do que responsabilizou ao candidato socialista. Seguirá avanzando, dixo, apoiado por un Goberno "que é o que máis cartos investiu en Pontevedra en toda a historia".
Iván Puentes, pola súa banda, destacou que a súa candidatura conxuga "mocidade e experiencia" que integran persoas "que teñen a frescura e os folgos que precisa Pontevedra para sacarnos do adormecemento actual e dar sempre a cara pola cidade".
O cabeza de lista socialista convidou os pontevedreses a preguntarse se nos últimos tempos esta capital está a aproveitar todas as súas oportunidades e traballando adecuadamente para sentar as bases dun futuro con emprego e oportunidades para os seus cidadáns.
El asegurou que Pontevedra "ten que espertar" e que á cidade "hai que meterlle unha nova marcha", algo que ao seu xuízo "só o pode facer un novo equipo de goberno" que estea liderado polo PSdeG-PSOE tras o próximo 28 de maio.
"Uns están evidentemente cansos e desganados, outros non teñen posibilidade ningunha de chegar á Alcaldía, e menos mal; e outros non gobernaron na súa vida", subliñou Puentes, que insistiu que só o PSOE pode ofrecer "renovación, ganas, solvencia e ilusión".
A este respecto, centrou gran parte do seu discurso nas actuacións que "levábamos anos soñando" e que, segundo reiterou, faranse realidade cos 25 millóns de euros que investirá o Goberno central para rexenerar toda a costa marítima e fluvial da cidade.
"Algúns, que andaron moi enfurruñados estes días polo noso éxito, que é o éxito de Pontevedra, chamáronlle a isto encubrimento, pero eu chámolle facer cidade, cumprir cos nosos veciños e demostrar que sabemos e estamos preparados para gobernar", sentenciou.
Arroupando a Iván Puentes e ao seu equipo estiveron tamén, entre outros cargos socialistas, a presidenta da Deputación, Carmela Silva, o secretario provincial do PSdeG-PSOE, David Regades, ou o líder dos socialistas galegos, Valentín González Formoso.
"Pontevedra necesita a Iván Puentes, unha persoa entusiasta que fai política construtiva, capaz de ter visión de cidade e de imaxinar a Pontevedra que quere", sinalou González Formoso.