Como cada ano, coincidindo co Día do Pilar, a comandancia da Garda Civil de Pontevedra vestiu as súas mellores galas para festexar á súa patroa. Centos de persoas participaron nos actos castrenses que se celebraron este mediodía.
Neste marco, o coronel Simón Venzal, quixo destacar que a atención ao cidadán que presta a Garda Civil, xunto coas súas tarefas de investigación e prevención, situou a Pontevedra cunha taxa de delincuencia "bastante por debaixo" da media nacional.
"Contribuímos a proporcionar á sociedade pontevedresa a necesaria percepción de seguridade", sinalou o xefe da comandancia pontevedresa, que subliñou que no último ano volvéronse a superar as 45.000 actuacións na provincia, un 2,7% máis que en 2022.
A elas sumou as máis de 9.000 actividades de carácter humanitario realizadas pola Garda Civil en todo tipo de auxilios e rescates ou os avances que se deron para alcanzar unha "mellor atención e protección" ás mulleres vítimas da violencia machista.
Este último ámbito supuxo durante o último ano un 18% de toda a actividade da Garda Civil en Pontevedra, unha porcentaxe moi similar aos ciberdelitos que, tras supoñer case un terzo dos delitos atendidos en 2021, supoñen agora un 18,8% das infraccións penais.
"O equipo de ciberdelincuencia creado hai dous anos asumiu unha carga importante de investigación e aumentou o esclarecemento destes delitos e as cantidades de diñeiro recuperadas", apuntou o coronel Venzal.
A loita contra o narcotráfico, na que Venzal lamentou que "non sempre alcanzamos ás redes de pleno e ao seu lucrativo potencial", a prevención e investigación en materia de incendios forestais ou as actividades divulgativas nos colexios formaron parte deste balance.
A cerimonia, ademais de polo coronel Simón Venzal, estivo protagonizada pola subdelegada do Goberno en funcións, María Isabel Alonso de Linaje, e o alcalde de Poio, Ángel Moldes, que impuxeron unha vintena de condecoracións.
Entre os homenaxeados, ademais de persoal do corpo aos que se distinguiron por prestación de servizos meritorios, estiveron unha fiscal de Vigo ou unha xuíza de Cambados.
Ademais, un dos momentos máis emotivos foi a entrega da metopa conmemorativa ao garda civil Enrique Pérez Pereira, obrigado a retirarse do servizo por motivos de saúde.
O coronel Venzal quixo ter tamén un recordo ás 197 mulleres que, hai 35 anos, incorporáronse por primeira vez á Garda Civil, catro delas en Pontevedra. Destas últimas, dúas continúan en activo, unha en Pontevedra e a outra na Estrada.
Os actos concluíron, como é habitual, cunha homenaxe aos falecidos, a interpretación do himno da Garda Civil e do himno español, así como cun desfile das diferentes unidades do instituto armado que traballan na área de Pontevedra.
Esta festividade da patroa da Garda Civil incluíu ademais , previamente aos actos na comandancia, unha misa en honra á Virxe do Pilar que se celebrou no Mosteiro de Poio.
A de Pontevedra foi a única das celebracións que o instituto armado celebrou este ano na provincia, xa que os actos previstos en Vigo foron suspendidos como sinal de duelo polas catro persoas falecidas onte no incendio que calcinou un edificio da cidade olívica.