A contorna da avenida de Ourense, en Marín, está a vivir unha intensa actividade de obras nos últimos días.
Ante esta situación, o Concello recoñece as "molestias" que poden supoñer as obras para a poboación, pero insiste en que están tratando de coordinar todas as actuacións, "que son relevantes e necesarias de levar a cabo".
Na zona situada diante da oficina de Abanca, a empresa Fechi, que forma parte da UTE encargada da parte da calzada da humanización da avenida de Ourense, procedeu este luns a arranxar o socavón que se produciu neste punto da estrada.
Quedou resolto "definitivamente" despois de que se pavimentase hai unhas semanas de xeito provisional.
Na contorna da biblioteca e da futura rotonda, a brigada municipal de augas está a renovar os servizos neste punto, que xa estaban moi afectados polo paso do tempo e xeraban problemas con frecuencia. O Concello asume esta actuación con fondos propios.
Ademais da propia humanización da beira dos edificios na avenida de Ourense, estanse a realizar conexións entre a rede que vai por esa vía e o novo colector principal do Paseo.
Estes traballos están realizándose por parte de Moncosa, a empresa da UTE encargada da humanización, e xa levan executados varios puntos de conexión.
Dentro do gran proxecto de mellora do comportamento hidráulico do Río Lameira, co que se está actuando en todo o seu colector e conexións á rede, farase agora este traballo que reconecte o novo colector do río co da avenida de Ourense.
Tamén se está a renovar a liña eléctrica de Fenosa na conexión entre Concepción Arenal e Jaime Janer.
O obxectivo é renovar máis de 300 metros de liña e mellorar o subministro eléctrico, tratando de evitar os problemas que nos últimos tempos veñen sufrindo as persoas usuarias, especialmente na zona do cruce no que se verá afectado o tráfico estes días.