A Consellería de Emprego, Comercio e Emigración, vén de aprobar unha achega de 220.000 euros solicitada polo Concello de Cuntis para continuar desenvolvendo o Programa Integrado de Emprego (PIE) no que resta de 2024 e o vindeiro exercicio 2025.
Segundo informou o alcalde, Manuel Campos, esta ferramenta ten coma obxectivo ainserción laboral dun cento de persoas que se atopan en situación de desemprego.
Cuntis é un dos concellos da contorna adheridos a este programa, xunto con Caldas de Reis, Portas, Barro e Moraña.
O PIE desenvólvese nas dependencias do Centro Ocupacional, situado no polígono industrial da Ran, e conta en cada unha das súas convocatorias cunha gran participación. "É unha ferramenta moi efectiva para axudar a emprender e mellorar a inserción laboral", destacou o alcalde.
Manuel Campos lembrou que Cuntis tamén conta desde o ano 2009, no polígono industrial da Ran, cun Servizo de Orientación Laboral.
Por último, o alcalde destacou que o municipio pechou o terceiro trimestre de 2024 cos rexistros máis baixos de desemprego dos últimos 20 anos, baixando por primeira vez das 200 persoas (189).