Confirmado un novo caso de violencia de xénero en Moaña cunha vítima veciña de Pontevedra. A muller faleceu en "circunstancias sospeitosas" ao caer o seu coche á auga no paseo marítimo de Domaio e a Garda Civil investiga o ocorrido.
O subdelegado do Goberno en Pontevedra, Abel Losada, confirmaba pola mañá que a Garda Civil estaba a investigar o ocorrido "sen descartar ningunha hipótese", pero recoñecía xa esas estrañas circunstancias e tamén que había "algúns indicios preocupantes".
A última hora da tarde deste sábado, as investigacións realizadas pola Garda Civil confirmaron ese carácter machista dos feitos. O home foi detido no Hospital Povisa de Vigo, onde está ingresado, como presunto autor dun delito de homicidio no ámbito da violencia de xénero.
A muller, Fadoua Akkar, de 41 anos e orixe marroquí, era veciña da parroquia pontevedresa de Salcedo. Non estaba rexistrada como vítima no sistema VioGén e, por tanto, non existía ningunha medida restritiva ou de protección ao redor dela.
Ía no coche cun home, A.C.T., de 47 anos e veciño de Moaña. Ela faleceu e el sobreviviu e está nun hospital de Vigo con hipotermia e perda de consciencia.
Este home si estaba no sistema VioGén por uns feitos violentos acaecidos no ano 2012. A Audiencia Provincial de Pontevedra condenouno e ingresou en prisión. Ademais, tivo unha orde de afastamento vixente ata o ano 2020 con respecto á muller vítima daqueles feitos.
Ocorreu sobre as 5.00 horas da madrugada. O coche estaba conducido polo home cando se precipitou á auga e hai testemuñas que indican que o vehículo acelerou notablemente e penetrouse nunha zona peonil antes de caer á auga.
O subdelegado do Goberno quere ser "moi prudente" mentres a investigación está en marcha, pero lembra que, de confirmarse esta morte como un caso de violencia de xénero, sería a primeira vítima mortal na provincia este ano.
O último crime de violencia machista na provincia remóntase a xuño de 2023, de modo que "de confirmarse a orixe machista desta morte, e sempre á espera que conclúa a investigación, rompería unha serie positiva de 15 meses", sinalou o subdelegado. Horas despois, confirmábase.
Unha muller que se atopaba preto do club de xubilados de Domaio presenciou directamente como un coche caía en dirección ao mar, aínda que naquel momento non podía precisar se acabara na auga ou na zona de rocas que a precede.
Chamou á Policía Local e estes ao 112, que solicitaron a actuación de Urxencias Sanitarias de Galicia-061, de Salvamento Marítimo e do Servizo de Gardacostas de Galicia, dos Bombeiros do Morrazo, da Garda Civil, de Tráfico e dos voluntarios de Protección Civil de Moaña. Tamén foron informados os Bombeiros de Vigo.
Salvamento Marítimo mobilizou ao seu persoal a bordo da embarcación de rescate Salvamar Mirach. Os bombeiros conseguiron rescatar ao home, que conducía o vehículo, e finalmente, os equipos de intervención rescataron o corpo sen vida da muller, que se atopaba flotando na auga, durante as tarefas de retirada do coche.
CONCENTRACIÓN EN MOAÑA
Este domingo 6 de outubro, ás 18.00 horas, hai convocada unha concentración diante do Concello de Moaña. En caso de choiva, trasladarase ao salón de plenos.