A condena á agresión sufrida polo presidente do Goberno, Mariano Rajoy, en Pontevedra foi unánime. Especialmente desde os ámbitos políticos. Non só os principais líderes dos partidos nacionais expresaron o seu rexeitamento ante o sucedido, senón tamén os políticos locais han trasladado a súa solidariedade co dirixente popular.
O propio alcalde de Pontevedra, Miguel Anxo Fernández Lores, remitiu un correo electrónico a Mariano Rajoy no que sinala que, como representante dos pontevedreses, "quero manifestarlle a nosa magoa polo suceso en si mesmo, e porque este teña acontecido nunha das nosas rúas, escenarios de convivio, harmonía e respecto, e auténticos foros do diálogo e o debate cotián".
Fernández Lores trasládalle ademais a Rajoy "a nosa solidariedade e as nosas firmes conviccións democráticas, alonxadas da violencia e a despropósito".
Pola súa banda, a presidenta da Deputación, Carmela Silva, expresou a súa máis rotunda condena á agresión que sufriu Mariano Rajoy durante a tarde deste mércores pola tarde. Silva cualifica de "intolerable" o ocorrido. "O comportamento do agresor é incomprensible e inxustificable, completamente censurable porque calquera tipo de violencia só pode ter o seu absoluto rexeitamento e xamais pode ter cabida na democracia", afirma. A presidenta provincial trasladou ao presidente do Goberno a súa solidariedade e o seu respaldo ante un suceso que, segundo indicou, "non pode xustificarse baixo ningún concepto".
Tras a agresión sufrida durante a tarde do mércores en Pontevedra polo candidato do Partido Popular, desde a agrupación En Marea tamén se quixo manifestar a súa rotunda condena ante calquera acto que empregue a violencia como medio.
Tamén, desde esa agrupación, queren mostrar a súa repulsa polo tratamento de medios de prensa de tirada estatal relacionasen o agresor con este partido político. Indican que a rectificación desta información falsa, horas máis tarde, non repara o dano político causado e pon en dúbida a suposta profesionalidade do medio.