O Xulgado de Instrución número 3 de Pontevedra condenou un matrimonio que atacou e ameazou á irmá del durante unha discusión na vivenda familiar en Samieira, Poio.
Os feitos ocorreron sobre as 17.30 horas do 28 de febreiro de 2022 na casa na que a vítima vivía cos seus pais.
O altercado iniciouse tras a chegada á vivenda do seu irmán e a súa esposa. A sentenza conclúe que "con ánimo de amedrentala", o seu irmán ameazouna "dicíndolle dispároche, fágoche un buraco na cabeza, a pistola téñoa abaixo".
Seguidamente, a súa cuñada colleuna fortemente polo pescozo. Como consecuencia da agresión, a vítima sufriu lesións no pescozo que tardaron tres días en curar e non lle deixaron secuelas.
O xulgado condenou ao seu irmán por un delito de ameazas á pena dun mes de multa a razón de 6 euros día e á súa cuñada por un delito leve de lesións a un mes de multa a razón de 4 euros día. Ela, ademais, deberá abonar ao Servizo Galego de Saúde os 256,87 euros que custou curar á vítima.
Os dous condenados recorreron a sentenza ante a Audiencia Provincial de Pontevedra, pero a sección cuarta do tribunal provincial desestimou o recurso e confirmou o fallo inicial.