Un grupo de representantes sindicais da CIG e persoal sanitario despregaba unha pancarta de apoio co pobo palestino este mércores 24 ás 11.30 horas na entrada do Hospital Montecelo baixo o berro de "os hospitais de Gaza non son unha ameaza".
Este acto convocado por CIG-Saúde quere visibilizar a preocupación que supón para os profesionais sanitarios os ataques de Israel ao pobo palestino sen respectar nin os espazos de atención a pacientes.
"A concentración foi pedida polo persoal sanitario ao ver como se bombardean hospitais, ambulancias... Sentímonos ameazados. Daste conta de que non se respecta nada", afirma Begoña Mallo, delegada de CIG-Saúde en Pontevedra.
As protestas realizábanse en distintos hospitais das sete principais cidades de Galicia en apoio ao persoal sanitario de Gaza e contaba co apoio da Asociación Galaico Árabe Jenin, Mar de Lumez e Galiza por Palestina.
Desde a CIG afirman que bombardear hospitais, centros de saúde e ambulancias é un crime de guerra que converte en vítimas ás persoas que deberían coidar e socorrer á poboación palestina.
Begoña Mallo recoñecía que manteñen contacto con persoal sanitario voluntario que, na maioría de casos, está a abandonar a zona ante a gravidade da situación e relata que "é peor do que sae nos medios de comunicación porque a fame está a facer grandes estragos na poboación".
Denuncian tamén que o estado de Israel utiliza os ataques aos centros sanitarios dentro da estratexia de "barbarie e xenocidio" contra o pobo de Gaza e tamén en Cisxordania.
Explica que a información que lles trasladan os profesionais médicos manifesta que se realizan operacións "sen anestesia, sen luz, sen nada. Están facendo o que se pode", laméntase Begoña Mallo.
Desde o sindicato nacionalista manifesta que é necesario facer fronte a "esta barbarie" e reclamar o final das accións emprendidas polo estado de Israel.