O alcalde de Cuntis, Mnauel Campos, e o delegado territorial da Xunta de Galicia en Pontevedra, Agustín Reguera, visitaron este luns a Casa Niño de Arcos de Furcos para supervisar de primeira man o seu funcionamento.
Durante o encontro, puideron observar as instalacións, interactuar co persoal da Casa Niño e coñecer de preto a dinámica diaria e a atención que se presta aos nenos e nenas.
Estiveron acompañados por técnicos do departamento de Servizos Sociais da Xunta de Galicia, que aproveitaron a visita para recoller información detallada sobre o funcionamento da Casa Niño e identificar posibles áreas de mellora ou necesidades específicas.
Esta información será fundamental para seguir optimizando os recursos e garantir a excelencia na atención á infancia en Cuntis.
Agustín Reguera destacou o importante papel que desenvolven as Casas Niño como recurso de conciliación para as familias e como espazo de desenvolvemento integral para os máis pequenos. "É fundamental que estes servizos conten con todos os medios necesarios para ofrecer unha atención de calidade", sinalou.
Manuel Campos agradeceu a visita e o interese da Xunta por coñecer as necesidades desta Casa Niño. "A colaboración entre administracións é esencial para garantir o bo funcionamento destes recursos e para seguir mellorando a calidade de vida dos nosos veciños", afirmou.
A visita concluíu cunha reunión na que se abordaron posibles vías de colaboración e apoio para a Casa Niño de Arcos de Furcos, reafirmando o compromiso da Xunta de Galicia e do Concello de Cuntis co benestar dos máis pequenos.
Arcos Casa Niño conta na actualidade con cinco nenos e nenas de entre un e dous anos e recibiu máis de 65.000 euros da Xunta de Galicia dende a súa posta en marcha no ano 2021.