Aos poucos, os propietarios do edificio que se incendiou o pasado 1 de febreiro na praza da Ferrería comezan a dar os primeiros pasos para rehabilitar o inmoble.
Ao mesmo tempo que un equipo de arquitectos traballa xa no proxecto para recuperalo, comezaron os traballos de desentullo para retirar da zona os restos do incendio.
A empresa que se encarga destes traballos comezou despregando un valo de protección ao redor da fachada do edificio para evitar o acceso dos curiosos á zona.
Á primeira hora da tarde deste martes unha pequena pa escavadora accedeu ao interior do edificio para comezar a retirar parte das pedras e outros materiais que quedaron depositados alí tras o sinistro.
Ademais, os traballos incluirán a retirada de parte da estrutura do edificio que, a pesar de que non se esborrallou polos efectos do lume, quedou nun precario estado polo que non se poderá recuperar.
Xunto coa limpeza de todo o seu interior, os operarios tamén asumirán nesta primeira fase dos traballos, as actuacións necesarias para garantir a seguridade da estrutura e reducir o risco de esborralle mentres non se executa o proxecto integral de rehabilitación.