Este luns 23 de setembro o Servizo Galego de Saúde (Sergas) inicia a campaña de vacinación para protexer aos colectivos máis vulnerables contra a gripe e a covid-19.
Na área sanitaria de Pontevedra e O Salnés, a campaña comezou na residencia de maiores de Vilaboa, marcando o inicio da primeira fase dirixida a usuarios de centros sociosanitarios - residencias xeriátricas e centros para persoas adultas con discapacidade.
Como novidade este ano 2024, a vacinación tamén inclúe o persoal desas institucións.
Nesta primeira xornada de vacinación na comarca, inoculáronse arredor de 200 doses da gripe e da covid.
Ata o venres 4 de outubro, data na que remata esta fase, a área sanitaria prevé administrar unhas 1.700 doses de forma progresiva, seguindo un cronograma con visitas programadas aos 24 centros sociosanitarios espallados polos distintos concellos de ambos distritos sanitarios, Pontevedra e O Salnés.
A inmunización en Pontevedra-Salnés está a cargo das/os profesionais que integran os Equipos de Soporte de Atención Domiciliaria (ESAD) asignados a cada zona e enfermeiras/os voluntarias/os inscritos para a ocasión.
Nesta campaña están coordinados polo enfermeiro Diego Canedo, especialista en Enfermaría Familiar, e baixo a supervisión da subdirectora de Enfermaría de Atención Primaria, Silvia Amoedo.
Nesta ocasión é unha dobre vacinación nas residencias de maiores e centros de discapacidade, así como a aplicación dunha inxección a bebés para previr o virus respiratorio sincitial (VRS), que pode orixinar a bronquiolitis.
Paralelamente a esta campaña, desenvolverase a da gripe, que tamén é estacional e cuxa poboación diana son os nenos de 6 a 59 meses, os estudantes de centros sanitarios e sociosanitarios, o persoal dos centros de educación infantil e o persoal con exposición laboral directa a animais ou aos seus secreciones.
Ademais, a vacinación da gripe tamén inclúe aos fumadores, ás persoas con enfermidade celiaca e ás persoas con fístula de líquido cefalorraquídeo e implante coclear ou á espera deste, xa que teñen maior risco de complicacións desta enfermidade.
NOVIDADES DA CAMPAÑA
- Incorporación dunha vacina intranasal contra a gripe para os nenos de entre 2 e 5 anos.
- Vacinación contra a gripe ao persoal dos centros de educación infantil nos que haxa nenos de ata cinco anos.
- Vacinación aos coidadores daquelas persoas inmobilizadas nas súas casas e que non poden desprazarse ata os seus centros sanitarios.
PUNTOS DE VACINACIÓN
A vacinación contra a covid e a gripe desenvolverase en varios puntos ata o 31 de decembro: residencias de maiores, centros de discapacidade, hospitais públicos, grandes recintos e nos centros de atención primaria.
- Con todo, a vacinación exclusiva contra a gripe desenvolverase nos puntos de vacinación habituais (centros de saúde) e comezará a partir do 7 de outubro cos nenos de 6 a 59 meses, con patoloxías de risco e con aquelas persoas inmobilizadas e os seus coidadores.
- A partir do 14 de outubro será a quenda das persoas de máis de 80 anos, co persoal sanitario, de farmacia e de emerxencias, así como coas persoas institucionalizadas e en situación de inmunosupresión.
- As persoas de 70 a 79 anos poderanse vacinar a partir do 28 de outubro e as de 60, menores de 60, con patoloxías de risco, embarazadas, o persoal de servizos esenciais e con exposición laboral farano a partir do 11 de novembro.
- Finalmente, os conviventes con persoas de risco e o resto da poboación diana poderán acceder á vacina da gripe a partir do 18 de novembro.
VIRUS VRS EN BEBÉS
A vacinación contra o VRS tamén arrinca este luns e estenderase ata o 31 de marzo de 2025.
Respecto ao virus respiratorio sincitial, na campaña anterior alcanzouse unha porcentaxe de inmunización global superior ao 95% e logrouse reducir nun 90% os ingresos por VRS.
Os nados durante a campaña de inmunización, os menores de seis meses e determinados grupos risco son os bebés que deben inmunizarse contra a enfermidade.
Deste xeito, os nados durante a campaña recibirán a inmunización no hospital tras o nacemento, os bebés nados desde o 1 de abril serán citados a partir do 30 de setembro e os prematuros e lactantes con alto risco de enfermidade grave por VRS serán citados ao comezo da campaña.