Cinco acusados de pertencer a unha banda de narcos de Albania, Holanda, Portugal e España admitiron este luns ante a sección segunda da Audiencia Provincial de Pontevedra formar parte dunha organización que se dedicaba ao tráfico de marihuana, haxix e heroína, que foi desmantelada en 2018 baixo a coordinación do Xulgado de Primeira Instancia e Instrución número 3 de Cambados.
Houbo outros tres procesados que non recoñeceron os feitos dos que lles acusa a Fiscalía mentres que outro dos acusados non se presentou á vista oral polo que se formulará unha requisitoria de busca e captura contra el.
Polo delito contra a saúde, é dicir, tráfico de drogas, Alexander e José Ramón aceptaron unhas condenas dun ano, dez meses e 15 días de prisión. Para Florence, a pena é dun ano e 9 meses e para Miguel Ángel e Ana Belén un ano e seis meses. Cada un deles terá que abonar unha multa de 69.751 euros excepto Ana Belén cuxa multa é de 52.239 euros.
Polo delito de integración nun grupo criminal a condena para estes cinco acusados é dun mes e 15 días polo que, obrigatoriamente, cámbiase por tres meses de multa a razón de seis euros diarios.
Os maxistrados da sección segunda acordaron incoar dúas pezas separadas que darán lugar a senllos xuízos sinalados para este xoves 24 de novembro. Por unha banda, xulgarase ao procesado en busca e captura e por outra, aos tres presuntos integrantes desta organización criminal que hoxe non alcanzaron acordo coa Fiscalía e que se enfrontan a condenas de cárcere que chegan ata os once anos e multas que alcanzan os 600.000 euros.
Inicialmente eran once os investigados nesta causa pero dous deles xa faleceron.
Tal como recolle o Ministerio Fiscal no seu escrito de acusación, os feitos remóntanse a 2016, cando cinco dos acusados realizaban unha actividade sostida e entre todos estruturada con encomenda de tarefas particularizadas a cada un deles para o coidado e explotación de distintas plantacións de cánnabis, atopándose na investigación case 500 plantas en diferentes naves industriais de Rianxo e Verín.
Ademais, en 2018, púidose coñecer que dous dos investigados concertarían a adquisición dunha partida de haxix para introducilo na provincia de Pontevedra e comercializalo, contando coa axuda doutros dos acusados. Ese mesmo ano, a banda tamén levaría a cabo outros labores para a introdución de heroína en Pontevedra.
Finalmente, nunha terceira intervención policial, incautouse heroína, que os procesados obtiñan en Holanda. Segundo os investigadores, viaxaban a Países Baixos en avión desde Portugal, e regresaban coa mercadoría oculta nun coche.