A Asociación Boa Vida ten en marcha a súa quinta campaña de Nadal, co obxectivo de alcanzar os 7.000 xoguetes á venda na súa tenda solidaria.
Ata a data, chegaron a través de doazóns a colleitar máis de 5.750 xoguetes, dos cales 3.750 foron recuperados para a venda a prezos moi asequibles.
Clara Setti, xerente das tendas da empresa de inserción Vivir do Traballo da Asociación Boa Vida, explica que a campaña non só busca proporcionar xoguetes a baixo custo, atendendo as demandas de familias nunha complicada situación económica, senón que tamén promove a economía circular e a sustentabilidade.
"Con esta campaña evitamos que toneladas de plástico acaben no lixo", afirma Setti. Cun prezo que oscila entre un 85% e un 90% máis barato ca no mercado convencional, os xoguetes convértense nunha alternativa accesible para moitas familias.
Ademais, as máis de 100 familias con menores ao seu cargo, que están a ser acompañadas ao longo de todo o ano a través da Oficina de Dereitos e Deberes Sociais de Boa Vida, van ter un bono gratuíto para poder dispor "dos produtos e os xoguetes que hai en tenda para poder agasallar os nenos e nenas das súas familias con xoguetes, e que o seu Nadal sexa o máis normalizado posible dentro da situación de desvantaxe económica na que están", indican desde a Asociación.
Boa Vida estableceu 35 puntos de recollida en institucións, empresas e colexios, onde se convida á cidadanía a doar xoguetes en bo estado. Tamén poden achegarse á sede da tenda solidaria en Rúa da Seca, 3, de Pontevedra.
"Os xoguetes que nos doan son enviados ao noso almacén, onde aí pasan un proceso de revisión e preparación moi detallado. Por exemplo, as bonecas hai que peitealas, os quebracabezas hai que contalos, limpalos, revisar se están completos, comprobar o funcionamento dos xoguetes electrónicos…, porque nós o que tentamos é que luzan na tenda como novos", sinala Setti.
A xerente convida a que a xente "veña ás nosas tendas a coñecernos, non só, digamos, doar, senón tamén que poidan coñecer os excelentes produtos que temos en cada unha das nosas tendas".
Boa Vida ten dúas tendas en Pontevedra. "A da Rúa da Seca está máis orientada a nenos e todo o que ten que ver co fogar e con mobles, e a tenda de Santa Clara, 35, está orientada ao público adulto, onde temos roupa, calzado, enxoval, decoración e libros tamén", puntualiza.
Desde este mércores 18 de decembro, a campaña de Nadal incorpora unha innovadora iniciativa: o trueque do "Apalpador". Os nenos poden traer á tenda os seus xoguetes en bo estado e, a cambio, recibir un libro ou un peluche pequeno.
Ademais da campaña de xoguetes, Boa Vida tamén promove ofertas especiais nas súas dúas tendas. Na de Santa Clara teñen unha zona de pezas a un euro e na da Seca todos os mércores lanzan unha promoción ao 50% en produtos seleccionados.
Tamén durante esta campaña de Nadal están a lanzar descontos semanais en distintos artigos. En concreto, até o sábado 21, teñen ofertas especiais en roupa de festa (tenda de Santa Clara) e en artigos para bebés (tenda da Seca).
As tendas solidarias forman parte da empresa de inserción laboral que promove Boa Vida, onde o persoal que traballa nas mesmas é xente que chegou á Asociación sendo unha persoa en risco de exclusión, acreditada pola Xunta de Galicia.
Grazas ao crecemento da organización, o equipo de Boa Vida pasou de 7 empregados en 2023 a 11 en 2024.
As tendas están abertas para recibir doazóns e tamén para que o público poida coñecer os produtos que ofrecen a prezos accesibles, para que todas as persoas poidan vivir con ilusión este Nadal.