O salón de actos do CEIP Manuel Padín Truiteiro de Soutomaior loce coma novo, unha vez rematada a atuación impulsada desde o Concello para a súa renovación.
As actuacións consistiron na construción dun novo patio de butacas, a mellora do alumeado e do pavimento do salón e a subsanación de diferentes eivas estruturais no escenario para favorecer a realización de actividades.
A actuación tivo un investimento de case 15.000 euros e buscou cubrir as principais necesidades que presentaba o salón de actos.
O obxectivo era que tanto o alumnado como o persoal docente do centro escolar poidan gozar dun salón de actos "en boas condicións e cunhas instalacións coidadas".
O alcalde de Soutomaior, Manu Lourenzo, e o concelleiro de Obras, Pablo Garrido, achegáronse esta semana ata o centro para ver os resultados desta actuación, que estivo consensuada co director do centro.
Manu Lourenzo sinalou que esta renovación "era unha actuación prioritaria" para o goberno local e por iso "non aforramos nin esforzos nin recursos para realizar estas obras e cubrir as necesidades trasladadas polo equipo directivo".
Tamén avanzou que mantén un "diálogo fluído e constante" co director do CEIP de cara a buscar máis melloras a curto, medio e longo prazo, co obxectivo de que o alumnado teña acceso ás mellores instalacións posibles.
Para o goberno local de Soutomaior, "investir en educación, dentro das competencias que lle corresponden ao Concello, é un obxectivo prioritario".