A implantación da prioridade peonil no paseo de Silgar supuxo a supresión de 38 prazas de aparcamento, pero o Concello de Sanxenxo cre que eses espazos eliminados quedan compensados "con fartura" coas novas bolsas de aparcamento habilitadas no municipio.
Así, o goberno local pon ao dispor de veciños e visitantes un total de 1.100 estacionamentos gratuítos distribuídos en sete parcelas situadas no centro urbano, catro delas novas este verán.
O goberno negociou a cesión do terreo con propietarios de dúas parcelas situadas na rúa Vigo, con capacidade para 235 vehículos, e doutra parcela máis en Progreso, á altura da nova rotonda no cruzamento coa Rúa Castelao, onde poderán estacionar 240 coches.
A estes tres novos estacionamentos disuasorios súmase outro que se habilitou nunha parcela municipal en Miraflores, próximo ao Pazo de Emilia Pardo Bazán, con capacidade para 160 coches. Estes estacionamentos foron acondicionados esta semana coa violación e roza do terreo e coa dotación de puntos de luz.
Durante este verán manterase tamén os outros tres de anos anteriores. Trátase do situado na rúa Progreso, na confluencia con Rúa Cesteiros, con capacidade para 72 vehículos; a bolsa de aparcamento de detrás da igrexa do Templo Novo con 153 prazas; e o que se atopa nunha parcela de O Tombo na que poden estacionar ata 240 vehículos.
Ás prazas de estacionamento gratuítas súmanse as 340 de pago do aparcadoiro Nauta e a Praza do Mar, e as dispoñibles no estacionamento de Fonte de Ramos, todas de pago.
Co obxectivo canalizar mellor o tráfico de Silgar e informar os condutores, dous paneis informativos en Progreso, na rotonda con Castelao e outro na de Arnelas, á altura da estación de autobuses, indicarán desde esta fin de semana o estado de ocupación do aparcadoiro de Nauta.