Un operativo conxunto da Garda Civil e os vixiantes da confraría de San Telmo permitiron interceptar a catro furtivos que foron sorprendidos en Poio con 80 quilos de ameixa da ría, dos que 14 tiñan un tamaño antirregulamentario.
Segundo informou o instituto armado, as catro persoas identificadas, tres homes e unha muller de entre 20 e 33 anos, son veciños dos municipios de Poio e Pontevedra.
Todos eles teñen un amplo historial de antecedentes por marisqueo furtivo e foron denunciados de novo por unha infracción administrativa ante a Xunta de Galicia.
Os feitos producíronse durante a madrugada do pasado venres, cando se detectaron a catro persoas que estaban a faenar na praia, á altura da zona do Ameixal. Desatendendo os requirimentos dos vixiantes da confraría, os furtivos abandonaron a praia e déronse á fuga, tratando de ocultarse nun monte próximo.
O despregamento do operativo, que nese momento estaba formado por catro efectivos da Garda Civil de Pontevedra e cinco vixiantes do servizo de gardapescas, permitiu a súa rápida localización. Foron interceptados cando fuxían a pé polo monte con catro sacos de ameixas nas súas mans.
Todo o contido dos sacos foi devolto na súa totalidade ao mar.
É o segundo operativo destas características que se realiza nos últimos días. A semana pasada, no marco doutro operativo conxunto, localizáronse tres veciños de Poio extraendo ameixa na zona da Seca.
Nesta ocasión os furtivos, que tamén foron denunciados por vía administrativa, arroxaron as capturas ao mar antes de ser identificados.