Nos últimos días, a ringleira de dezaseis magnolias do Paseo de Rosalía de Castro, que discorre en paralelo á avenida Raíña Vitoria de Pontevedra, é visita obrigada entre os pontevedreses para gozar da súa floración temperá.
As súas impresionantes flores, de tonalidades brancas, están en plena eclosión.
"Empezou aproximadamente hai 20 días, porque estábamos podando o seto da photinia, que está ao lado, e xa estaba rompendo a floración das magnolias", sinalan os xardineiros municipais que esta temporada se ocupan da vexetación do parque das Palmeiras e dos xardíns de Vicenti.
Estes profesionais recoñecen que nas últimas xornadas, mentres desenvolvían o seu traballo, puideron comprobar como "moita xente se vén a facer fotos, porque realmente están espectaculares".
Explican que este tipo de magnolia é especial, xa que as súas flores xorden antes da aparición das follas, creando unha estampa única.
"Chaman a atención porque florecen en momentos en que a maioría das árbores aínda non teñen flor", comentan os xardineiros.
Esta característica distintiva permite que as magnolias se convertan nunha atracción durante os meses do final do inverno, cando a maioría das árbores permanecen sen flores, e mesmo sen follas.
MAGNOLIA CHINESA
O libro As árbores da cidade de Pontevedra (obra de Jaime Bernardo Blanco-Dios e Amancio Castro González, editada polo Concello de Pontevedra) ofrece unha detallada descrición desta magnolia, de nome científico Magnolia x soulangiana, tamén chamada magnolia chinesa ou magnolia de folla caduca.
Esta árbore, pertencente á familia Magnoliaceae, ten unha orixe singular: foi obtida a principios do século XIX en Fromont, París, por Soulange-Bodin, quen fertilizou unha Magnolia denudata con pole de M. liliiflora.
A magnolia destaca pola súa espectacular floración invernal, con flores de cores que varían entre o rosa, morado e branco. Por este motivo, en castelán tamén se coñece como "magnolio de flores de tulipán".
MAGNOLIA & MAGNOLIO
Fronte á aliñación de 16 magnolias (Magnolia x soulangiana) no Paseo de Rosalía de Castro, atópase un magnolio (Magnolia grandiflora), unha árbore que, aínda que comparte xénero coa magnolia, ten características ben distintas.
O magnolio destaca pola súa follaxe frondosa e verde todo o ano, polo que a súa floración, cara a primavera-verán, pode pasar desapercibida entre as súas abundantes follas.
Esta combinación de especies crea un contraste interesante no parque das Palmeiras e xardíns da contorna.
MAGNOLIAS EN PONTEVEDRA
Na mencionada guía das árbores de Pontevedra contan 55 árbores de magnolia en flor, ubicados en varios puntos da cidade de Pontevedra.
Localización e número de exemplares en Pontevedra (datos de 2010): paseo de Rosalía de Castro (parque das Palmeiras, a carón da antiga Delegación de Educación) (16); xardíns de Vincenti (parque das Palmeiras) (6); alameda do Arquitecto Sesmeros (1); avenida de Santa María (1); rúa Afonso XIII (6); rotonda da Alameda (3); praza de San Xosé (5); parque das Camelias (A Parda) (3); avenida Eduardo Pondal (1); CEIP Campolongo (1); Centro Galego de Tecnificación Deportiva (1); barrio da Seca (1); parque do Cogomelo (2); xardín entre a avenida de Augusto García Sánchez e o parque da Constitución (1); rúa do Alcalde Hevia (1); Villa Pilar (1); e rúa Padre Luís (5).
