A Deputación de Pontevedra presentou este martes a campaña de promoción turística que levará a Fitur 2025 o próximo 23 de xaneiro coa lema 'Cando volves?', para difundir os atractivos que ofrece o interior da provincia.
Este acto de presentación, conducido pola xornalista Noa García, tivo lugar no invernadoiro dun hotel rural da parroquia pontevedresa de Tomeza coa asistencia dun centenar de persoas, entre autoridades políticas e representantes do sector turístico.
Coa campaña promocional que se exhibirá na Feira Internacional de Turismo de Madrid "había que deixar claro que nas Rías Baixas había máis que costa", segundo explicou a deputada de Turismo, Nava Castro. "Somos recoñecidos polo litoral, e o interior chama a atención e ten moito que ofrecer", engadiu.
Unha vintena de localidades de municipios como Rodeiro, Vila de Cruces, Ponteareas, Caldas de Reis, Cuntis, A Cañiza saen reflectidos nos vídeos elaborados por Esmerarte con música de Margarida Mariño, nunha "aposta polo verde", pola natureza, a "desconexión total" para "atopar a esencia interior".
O interior "non está teatralizado. Estamos nun destino natural sen ningún tipo de maquillaxe", destacou Nava Castro en referencia ás vacas, ovellas, xabarís ou lobos que habitan estas paraxes da provincia que "son menos coñecidos, polo que hai máis posibilidade de sorprender ao visitante".
"Cando ves a Galicia sínteste como na túa casa e a xente cando sae xa quere volver, xa ten morriña", reafirmou Castro.
A Deputación presentou varios vídeos que se mostrarán na principal Feira de Turismo do Estado na que se mostran, entre outros lugares, a Ruta das Camelias, o Camiño Taverneiro, o Camiño de Santiago pola Vía da Prata ou o Camiño de Inverno. "Lugares máxicos" como bosques, ríos, campo, aldeas, hórreos, petróglifos, "ou para ver estrelas" sen a contaminación das grandes urbes en "unha viaxe dobremente interior, no persoal e no xeográfico".
Por primeira vez, a Deputación opta por estrear a campaña na provincia antes de mostrala en Madrid.
"Nunca antes se fixera tan protagonista ao anfitrión como ao visitante, e nunca antes se lanzou unha campaña onde se vira con tanta claridade que as Rías Baixas están compostas por 61 concellos", destacou o presidente da Deputación de Pontevedra, Luís López.
Pola súa banda o presidente do Clúster de Turismo, Alfonso Martínez, incidiu na importancia da desestacionalización e apuntou que esta campaña promovional "vai contribuír a que teñamos mellor rentabilidade", sen deixar de traballar "nun turismo sostible e responsable" e insistindo na necesidade de "preservar a contorna que temos, as nosas tradicións, a nosa cultura".
