O goberno local do Concello de Campo Lameiro, despois de ver os informes técnicos e as actas da mesa de contratación, decidiu adxudicar a Construcciones Abal por un importe total de 456.901,78 euros a rehabilitación da edificación da antiga Casa Escola de Couso.
Este inmoble será reconvertido en 5 vivendas con destino a alugueiro social.
Trátase da primeira solución habitacional de carácter social que se levará a cabo neste municipio.
O prazo máximo para rematar os traballos será o 15 de outubro de 2025 e a empresa adxudicataria non disporá de prórrogas para ter finalizadas as obras.
A empresa adxudicataria ofreceu como mellora a redución en dous meses do tempo de execución da obra e aumentou a garantía en 12 meses máis.
Pola súa banda, o alcalde Carlos Costa salientou a importancia que ten para o municipio esta iniciativa de vivenda social, única en Campo Lameiro.
O alcalde sinalou que estas cinco vivendas que están concebidas "para os distintos tipos de familias existentes na nosa sociedade e que non son só as tradicionais xa que tamén se adaptan a familias monoparentais, persoas que na súa liberdade individual prefiran vivir soas".
