Arrincamos unha nova entrega de "A cociña gourmet en conserva", coa calidade de sempre de Conservas Pescamar e un prato tradicional de México, onde aproveitaremos todos os beneficios do bonito do norte.
O bonito é un peixe azul rico en graxa saudable, xa que contén unha gran cantidade de ácidos graxos poliinsaturados. A esta calidade, hai que engadir os beneficios da súa presentación en aceite de oliva.
O bico de galo é unha preparación típica da gastronomía mexicana. Pódese degustar cuns 'nachos' ou ben como acompañamento doutros pratos. Hai varias teorías sobre o seu nome: sabor picante como que che pique un galo, o corte dos ingredientes semellante á comida do galo ou a cor parecida ao papo vermello desta ave.
Para preparar un delicioso Bico de galo mexicano con bonito do norte Pescamar necesitamos os seguintes ingredientes:
- 1 lata de bonito do norte en aceite de oliva Pescamar
- 2 tomates medianos
- 1/2 cebola branca
- 1/2 cunca de coandro fresco
- 1 chile
- 1 lima
- Sal ao gusto
Preparación:
Picamos fino os tomates, a cebola, o coandro e o chile. Introducímolos nun bol grande.
Engadimos o zume da lima e sazonamos ao gusto. Finalmente, incorporamos o bonito do norte en aceite de oliva Pescamar, previamente escorrido e esmigallado.
Mesturamos ben e deixamos repousar durante uns minutos para que os sabores se integren.
Servimos nun cunco e acompañamos con 'nachos' ou tortillas de millo.
En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
