A Lonxa de Campelo acolleu este mércores a presentación do programa da Festa da Ameixa.
O venres 18 de outubro a festa inaugurarase cun acto institucional no que se renderá homenaxe aos seus impulsores: Ricardo Collazo, José María Cores, Ricardo Pérez, Pedro Luis Soto, Ramón Blanco, Rafael Caldas, restaurantes Aquí Está, Casa Otilio, Bar Quiniela, Casa Laura, Ángela e José Benito Fernández Carballa. A título póstumo, tamén se recordará a Emilio Castiñeira, Jaime Pousada e Francisco Villaverde, todos membros da Asociación de Veciños de Campelo, e a Germán Alvariño Ucha.
Tamén neste acto entregarase a Ameixa de Prata a vinte mariscadoras das confrarías de Raxó, San Telmo e Lourizán, que se xubilaron ao longo do último ano.
A programación mestura gastronomía, propostas para todos os públicos, música en directo e ambiente mariñeiro para render culto ao produto estrela da ría.
O alcalde de Poio, Ángel Moldes, sinalou que esta é "a nosa festa máis senlleira" e destacou ás dificultades para organizala despois dun ano tan duro para un sector do que dependen moitísimas persoas en este concello.
A Festa da Ameixa é un escaparate para o produto da ría e, nesta edición, será japónica porque é a que agora mesmo se pode extraer dos bancos marisqueiros. Poderase degustar á mariñeira (9,50 euros), con fideos (8,50 euros) e con arroz (8,50 euros). Como principal novidade, a apertura da carpa degustación adiántase ao venres, a partir das 20.00 horas.
O sábado poderase degustar a ameixa de 12.00 a 16.00 horas e de 20.00 a 23.00 horas, e o domingo, de 13.00 a 16.00 horas.
No apartado musical, destaca o concerto de Azúcar Moreno, o sábado ás 23.00 horas na Praza da Granxa, e con entrada de balde.
Antes, desde as 21.00 horas, actuará Gustavo Almeida e a noite rematará coa música do DJ Jorge Álvarez.
Pero tamén haberá sesións vermú o sábado e domingo, ás 13.00 horas, con Terapia de Grupo e Take it Easy respectivamente. O domingo, ás 19.00 horas, a orquestra Ritmo Joven animará a festa, mentres que os fogos artificiais serán ás 21.30 horas.
Ademais, haberá canción mariñeira o venres con Pontis Veteris e Os Chispas do Lérez, e ao longo de toda a fin de semana inclúense as actuacións de agrupacións locais como Vides Novas, a Escola de Música Tradicional de Poio e a Escola de Acordeóns de Campelo.
Para os máis pequenos, o Concello de Poio organiza ludotecas infantís gratuítas con monitores que organizarán actividades e xogos o sábado e o domingo, de 13.00 a 17.00 horas.
O sábado inclúese tamén, ás 18.00 horas, o espectáculo Máis Saaabor!, unha proposta cómica para o público infantil e familiar de creación propia e dirixida por Avelino González en torno ao mundo da gastronomía e a alimentación saudable.
