Nas últimas semanas, a Policía Nacional confirma un aumento dos furtos en negocios das rúas máis comerciais de Pontevedra.
Así, segundo a información confirmada pola Policía Nacional, detectaron casos en comercios das rúas Peregrina, Benito Corbal, Michelena ou Cobián Roffignac.
A actuación máis habitual dos ladróns é entrar nos locais e, con rapidez, coller produtos expostos e saír correndo.
Coincidindo con este aumento, e coa chegada da época de compras de Nadal, a Policía Nacional difunde unha serie de consellos de prevención entre os comerciantes da cidade.
Este tipo de campañas son habituais cada Nadal, tendo en conta a maior afluencia de persoas nas zonas comerciais.
Ademais, reforzouse a presenza policial nos lugares con maior tránsito de persoas para estas compras ou para gozar da decoración de Nadal.
Estas accións policiais forman parte da campaña 'Comercio Seguro', na que axentes da Unidade de Participación Cidadá da Comisaría incrementan os encontros con comerciantes e asociacións para facerlles chegar as súas recomendacións para tentar non ser vítima dun ilícito penal.
Algúns consellos de seguridade básicos para previr ser vítima dun delito nestas datas poden ser:
En horario comercial, extreme a precaución nos momentos de maior afluencia de persoas e teña vixiados os obxectos de maior valor.
Tente non acumular diñeiro na caixa rexistradora e faga retiradas con frecuencia. Cando realice o ingreso desta recadación, evite rutinas durante o traxecto ao banco.
No relacionado co comercio electrónico, contrate medios e pasarelas de pago de entidades bancarias recoñecidas.
Se á súa chegada observa a porta do local forzada ou aberta, non entre, chame ao 091.
Se sofre ou presenza algún feito delituoso, avise á Policía Nacional, solicite ás testemuñas que permanezan no lugar até a chegada dos axentes e achegue toda a información do que suceda, evitando manipular calquera obxecto.