A evolución da segunda onda da covid-19 na área sanitaria de Pontevedra e O Salnés rompeu a tendencia descendente que rexistraba desde hai máis dunha semana. Un repunte nos contaxios elevou a 416 os casos activos, quince máis que onte, tras 42 novos positivos.
Pero o máis preocupante é que tamén aumentan os pacientes hospitalizados. Hai 20 pacientes con covid-19 ingresados nos hospitais da área, catro máis que onte. Dezasete deles evolucionan en planta, doce en Montecelo, catro no Hospital do Salnés e un en QuirónSalud Miguel Domínguez de Pontevedra.
Outros tres, como reflicte o balance do Servizo Galego de Saúde, están ingresados na unidade de coidados críticos (UCI) de Montecelo. É tamén un máis que hai 24 horas.
O resto, 396 infectados por covid-19, atópanse illados nos seus domicilios e recuperándose baixo supervisión médica.
Desde o inicio da pandemia 2.117 pacientes da área sanitaria superaron a covid-19, 27 máis desde onte, e rexistráronse 25 falecementos asociados ao virus.
En canto á realización de probas PCR, fixéronse na área sanitaria de Pontevedra e O Salnés un total de 53.559, 641 nas últimas horas. Desde onte, detectáronse 39 novos positivos por PCR. A estas probas súmanse as 36.080 seroloxías realizadas ata a data.
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 4.745. Deles 807 son da área da Coruña, 425 da de Lugo, 1.610 da de Ourense, 416 da de Pontevedra, 632 da área de Vigo, 686 da de Santiago e 169 da de Ferrol.
Do total de pacientes positivos, 40 están en UCI, 229 en unidades de hospitalización e 4.476 no domicilio. Polo de agora, en Galicia hai un total de 23.078 persoas curadas, rexistrándose 815 falecementos.
Desde o inicio da pandemia realizáronse en Galicia 579.828 probas PCR e 378.415 probas serolóxicas que, nas últimas 24 horas, permitiron detectar a 355 infectados.