O Concello de Poio anunciou o aumento a 2 euros por neno e menú as axudas que outorga para financiar os comedores escolares do municipio.
Así o trasladou o alcalde, Angel Moldes, ás representantes das Asociacións de Nais e Pais do Alumnado (ANPAs) nunha reunión previa á comisión de Economía e Facenda, que se realizou esta mañá, e na que tamén se deu conta desta modificación no convenio.
Segundo este convenio, ata o de agora as familias recibían unha axuda de 1,50 euros por comida e alumno, unha cantidade que aumenta en 0,50 euros máis e que permite reducir de xeito importante as tarifas que pagan por facer uso deste servizo de conciliación que funciona nos colexios de Chancelas, Lourido e Isidora Riestra.
Neste momento hai preto de 200 nenos inscritos nos comedores, aínda que esta cifra é variable ao longo do curso dependendo das necesidades familiares en cada momento.
Unha vez aprobado este aumento, esta nova axuda será efectiva a partir de abril, seguindo os trámites administrativos correspondentes.
O pago, como ata o de agora, farase directamente ás Anpas, que a repercuten no prezo que cobran a cada familia polo uso deste servizo, ben sexa a través de días soltos ou de xeito continuado.
Moldes subliña que os comedores escolares "son un servizo de conciliación fundamental para as familias do noso concello, e por iso desde o Goberno entendíamos que era necesario ampliar estas axudas".
O alcalde puxo en valor que ademais destas axudas, tamén contan con outro tipo de iniciativas para mellorar a vida das familias, como por exemplo, os programas concilia, bonificacións no IBI para familias numerosas, a nova unidade de atención temperá con terapias totalmente gratuítas para as familias con nenos menores de 6 anos, novas zonas de ocio, lúdicas e deportivas, entre outras.
Por último, o alcalde recordou que para o goberno local "as familias son unha prioridade, estamos empeñados en facer de Poio un concello cómodo para vivir, con máis oportunidades e con mellores servizos".