Chega unha nova entrega da serie "A cociña gourmet en conserva", da man de Conservas Pescamar. Nesta ocasión, imos preparar un 'tzatziki', a deliciosa crema untable grega cuxo ingrediente principal é o iogur, e onde aproveitaremos todas as calidades do atún.
O atún é un peixe con múltiples propiedades. Destaca a súa achega en proteínas de gran valor biolóxico e o seu alto contido en Omega-3. A estas importantes calidades, hai que engadir os beneficios da súa presentación en aceite de oliva, que ademais contribúe a potenciar o seu sabor.
Os principais ingredientes do 'tzatziki' son o iogur grego, mesturado con cogombro relado, aceite de oliva, mollo de limón, allo e algunha herba aromática, como pirixel, menta, pementa ou aneto. Na cociña turca teñen un prato similar de nome 'cacik', que se pode preparar como salsa de acompañamento ou, máis solta, como sopa fría.
Para preparar un delicioso Atún Pescamar en 'tzatziki', necesitamos os seguintes ingredientes:
- 1 lata de Atún Claro en aceite de oliva Pescamar
- 2 iogures gregos sen azucre
- 1 cogombro
- 1 cullerada de aceite de oliva virxe extra
- 1 cullerada de menta fresca picada (ou de aneto fresco picado)
- 1 dente de allo picado
- Sal
- ½ limón
- Pementa negra moída
Preparación:
Lavamos e pelamos o cogombro. A continuación, relámolo fino ata que teña un aspecto case de puré. Engadimos un chisco de sal e deixamos escorrer nun coadoiro (podemos presionar cunha culler para quitar a auga máis facilmente).
Á parte, nun cunco introducimos os iogures, a cullerada de aceite, o dente de allo picado, o zume de medio limón, a cullerada de menta picada, un chisco de sal e tamén un belisco de pementa. Mesturamos ben todos os ingredientes, agregamos o cogombro, o contido da lata de Atún Claro en aceite de oliva Pescamar e removemos ata obter unha crema homoxénea.
Deixamos repousar a salsa na neveira, tapada con papel filme. Servímola fría nunha salsera. Pode usarse como acompañamento de carnes, peixes ou ensaladas. Tamén para mollar verduras cortadas en bastóns ou ben para untar pan.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.