Unha muller tivo que recibir asistencia sanitaria na mañá deste mércores como resultado dun incendio declarado nunha vivenda en Marín.
A muller atopábase no interior da vivenda e foi retirada pola ventá, consciente en todo momento.
Foi atendida polos profesionais de Urxencias Sanitarias de Galicia-061 por inhalación de fume.
Os Bombeiros do Morrazo foron mobilizados para apagar o lume, que afectaba a unhas mantas acumuladas no interior dunha vivenda na rúa da Fuente del Oeste.
A Policía Nacional alertou ao 112 Galicia ás 11.45 horas e explicou que saía fume da casa afectada.
Os axentes usaron un extintor para apagar o lume e, á chegada dos bombeiRos, xa estaba case apagado.
Foi necesaria a intervención dos bombeiros para ventilar e realizar as medicións correspondentes.