A Praza da Ferrería, unha das máis emblemáticas de Pontevedra, foi o punto de partida dunha visita guiada ao centro histórico. Isto, por si só, non sería noticia. Cada día parten varios itinerarios similares. Pero hoxe, os seus protagonistas eran persoas con diversidade sensorial.
Cinco persoas, catro con distintos niveis de perda auditiva e unha con xordocegueira, participaron nunha iniciativa piloto impulsada por Turismo de Pontevedra, que busca que este tipo de visitas sexan accesibles para turistas con dificultades de audición.
Dous intérpretes en lingua de signos acompañaron a Inés, unha das guías turísticas municipais, no seu percorrido por algúns dos principais enclaves do centro histórico como as prazas da Peregrina, a Leña, a Verdura ou o Teucro.
"Foi unha proba para que os usuarios bos comenten que se pode mellorar", explicou Raquel Abollo, unha das guías que participan desta iniciativa, na que colabora a asociación Xoga, que é a que facilita a presenza das intérpretes.
As visitas, que son similares ás que se realizan de maneira estándar, "cambian de enfoque" en función do grao de discapacidade de cada asistente, engadiu Abollo, incluso utilizando outros sentidos como o tacto para transmitir os conceptos aos participantes.
"Son percorridos moito máis descritivos", destacou a guía turística municipal.
Turismo de Pontevedra quere realizar, polo menos, dúas visitas destas características no mes de xullo e outras dúas en agosto, que requirirán de inscrición previa para que as guías poidan adaptarse ás necesidades dos visitantes.
Se a iniciativa funciona, engaden desde este organismo, estudarase mantela dentro da oferta de visitas guiadas á cidade "a demanda" de colectivos do ámbito da diversidade funcional, de forma que "poida estar dispoñible durante todo o ano".
A concelleira de Turismo, Yoya Blanco, destacou que se trata dun programa "pioneiro" en Galicia, que actualmente está dispoñible en diversos museos ou a través de aplicacións móbiles pero non en visitas en espazos ao aire libre ou percorridos turísticos urbanos.
"Pontevedra é unha cidade diversa e igualitaria. Facía falta un servizo así", sinalou Blanco, que estivo acompañada do edil de Benestar Social, Marcos Rey, e mostrouse convencida de que esta iniciativa, enmarcada dentro do proxecto Comunico, "dará máis visibilidade á cidade".