O goberno galego pon data ao inicio das obras de reforma da estrada PO-546, entre Mollavao e Os Praceres. A previsión é que estes traballos, que sairán a licitación "de xeito inmediato", segundo Alfonso Rueda, comecen durante o próximo outono.
Así será despois de que o Consello da Xunta autorizara este luns a contratación destes traballos, nos que se investirán 6,8 millóns de euros, repartidos entre a execución da reforma e o pagamento dos 39 terreos que haberá que expropiar.
Esta actuación, subliñou Rueda, terá un prazo de execución de dezaoito meses e busca a transformación desta estrada autonómica que une Pontevedra e Marín e a mellora da súa funcionalidade, orientándoa ao tránsito de peóns, ciclistas e transporte público.
O principal cambio en todo este ámbito será a execución dunha senda pola marxe dereita da PO-546, de 3,5 quilómetros de lonxitude e cun ancho que oscilará entre os 2,9 e os 4 metros, entre os puntos quilométricos 0+590 e 4+090.
Irá en paralelo á estrada salvo na travesía da Gandarela, onde deberá ir separada do vial debido á falla de espazo entre as construcións existentes.
Haberá unha nova glorieta na intersección de acceso ao Centro de Investigacións Forestais de Lourizán coa PO-546, coa finalidade de reducir a velocidade dos vehículos que acceden á travesía da Gandarela procedentes de Marín e mellorar a seguridade no acceso a este centro.
Esta glorieta tamén facilitará o cambio de sentido dos vehículos procedentes de Marín que queiran acceder ao futuro aparcadoiro disuasorio que a Xunta ten previsto executar na contorna do punto quilométrico 2+800 desta estrada, cun investimento de 500.000 euros.
Ademais, melloraranse as paradas de transporte público, favorecendo a mobilidade en autobús entre Marín e Pontevedra, e renovarase a iluminación no treito de actuación.
No proxecto aprobado recóllense tamén distintas estruturas que redundan na mobilidade sostible, como a execución de dúas pasarelas a distinto nivel da senda peonil, unha de máis de 120 metros sobre o rego de Louriñas, e a outra de 45 metros sobre O Sartán.
Tamén se executarán muros de sostemento, necesarios pola proximidade da vía do ferrocarril nalgunhas zonas, prolongando os xa existentes para poder lograr un ancho de senda adecuado e obter zonas amplas nas que se prevé a instalación dun parque infantil.
A intervención complétase coa dotación de zonas de esparexemento, destacando a habilitación dun miradoiro, no punto 1+050, aproveitando o espazo inutilizable na marxe dereita da calzada, cun pequeno parque infantil e zona verde que permita gozar das vistas da ría de Pontevedra.
Mellorarase, tamén, a parada de autobús situada no punto quilométrico 1+460, na marxe dereita da estrada, cunha zona de estacionamento para o autobús e un novo refuxio e, a petición dos veciños do Sartán, haberá unha nova zona de aparcadoiro en liña.
No proxecto inclúese tamén a renovación da rede de augas fecais entre os puntos quilométricos 3+800 e 4, mellorando deste xeito a drenaxe das augas pluviais.