Miguel Anxo Fernández Lores, alcalde de Pontevedra, a concelleira Eva Vilaverde e técnicos municipais realizaban unha visita no mediodía deste mércores á casa consistorial para comprobar o avance das obras.
O rexedor mostrouse moi satisfeito coa imaxe que ofrece o interior do edificio, obra orixinal de Alejandro Sesmero. Os traballos de rehabilitación son executados por parte da UTE formada pola compañía pontevedresa Construcciones Ramírez e a portuguesa Revivis.
Actualmente falta por finalizar a remodelación de espazos na zona do soto, detalles xerais e a instalación do mobiliario. A intención do goberno local é que os traballos estean totalmente finalizados o 20 de xaneiro, celebración de San Sebastián.
Pero Lores non descarta a posibilidade de realizar algún pleno previo ou mesmo desenvolver no inmoble a recepción dos Reis Magos durante este Nadal.
"Están traballando seriamente cumprindo os prazos", manifestou o alcalde durante a visita lembrando que o edificio se ha recuperado para ofrecer garantías de accesibilidade, ascensor, baños inclusivos que permitan o cambio de cueiros de bebés e que poidan ser utilizados por persoas ostomizadas. "Estou moi contento co resultado da obra", asegurou Fernández Lores.
Gracia Amandi, arquitecta de Uña-Amandi Arquitectos, explicou que se espera que a obra estea finalizada o 10 de xaneiro. Indicou que o máis difícil para unha obra destas características é "ser respectuoso coa obra orixinal, respectando os valores".
Un dos aspectos máis destacables da reforma atópase na luminosidade que ofrecen todas as estancias. "É un dos elementos principais", subliñou a arquitecta facendo referencia ao lucernario que permite a entrada de luz a todo o edificio e a fachada acristalada.
Ademais, na obra resáltase a cantería encalada en branco, cando antes era pedra máis escura. Os solos da planta baixa tamén están conformados por mármore branco e incluíronse madeiras bastante claras.
A madeira predominante é castaño, que figura nos solos, falsos teitos e pezas das caixas construídas para albergar os servizos ou unha plataforma no salón principal a modo de miradoiro da estancia.
No caso das portas, de tonalidade verde e de gran tamaño, utilizáronse tres madeiras diferentes "con materiais máis fáciles de curvar", apuntou Gracia Amandi para afirmar que se buscaba crear unhas portas altas e lixeiras.
A arquitecta indicou que o encarecemento de materiais foi xestionado bastante ben ao realizarse traballos artesanais nos que primou a relación calidade-prezo. "Estou moi satisfeita", admitiu, polo uso de "calidades moi altas a custos moi razoables".
O custo desta actuación na Casa Consistorial situada na Praza de España ascende a 1,36 millóns de euros e o edificio será empregado para actos institucionais e protocolarios, incluíndo vodas civís.