Un total de dezanove 'narcolanchas', embarcacións rápidas destinadas ao transporte da droga, foron requisadas na última operación antidroga desenvolvida nas Rías Baixas.
Quince delas foron achadas nos rexistros realizados en naves situadas no norte de Portugal, mentres que as outras catro estaban ocultas en diferentes puntos de Pontevedra. Nestas entradas, tamén requisaron abundante documentación e 70.000 euros en efectivo.
Así o desvelou este mércores o delegado do Goberno en Galicia, José Miñones, que explicou que durante este operativo detivéronse 16 persoas, aínda que a operación "continúa aberta", polo que non se descartan máis arrestos "nos próximos días".
Os detidos, salvo un que xa ingresou en prisión, pasarán este xoves ao dispor do Xulgado de Instrución número 3 de Cambados, investigados polos delitos de contrabando, contra a saúde pública e pertenza a grupo criminal.
"Son operacións que levan moitos meses de investigación e cando saen á luz loxicamente non é un traballo dos últimos días senón de moito tempo detrás deles", subliñou Miñones, que destacou o traballo conxunto das autoridades españolas e portuguesas.
Fontes da investigación confirman que o grovense Francisco Javier Otero Magdalena, con antecedentes por narcotráfico, é considerado o líder da organización investigada, dedicada á fabricación destas 'narcolanchas' e o transporte da propia droga. Este home foi detido xa o sábado e este martes foi o primeiro en ingresar en prisión por orde xudicial, pois se esgotaba o tempo máximo de arresto preventivo.