Son as dúas opcións que a Asociación de Armadores de Buques de Pesca de Marín entenden como máis viables para que a flota galega siga faenando en Mauritania. En todo caso, apostan por vías de colaboración como serían a constitución de sociedades mixtas ou a posibilidade de investir en Mauritania para continuar faenando naquelas augas en condicións "igual de competitivas que os barcos de terceiros países que pescan na zona".
E así llo trasladaron, nunha xornada de traballo, ao director xeral de Programas e Cooperación de Mauritania, Mohamed O Hafedh Ejiwen. Acudiu a Marín para coñecer os resultados dun estudo de viabilidade en relación coa promoción de asociacións con Mauritania no sector da pesca.
"Explicáronse pormenorizadamente as diferentes fórmulas que permitirían á flota pesquera europea, e en particular á galega, seguir traballando en augas mauritanas", indican os armadores nun comunicado. O fin da asociación de armadores de Marín é "que os barcos galegos non se vexan apartados dun caladoiro tan rico e próximo a España, e que a actividade sexa rendible económicamente".
Para iso, analiza o marco dos investimentos estranxeiros en Mauritania, os gastos e procedementos que xeran a creación dunha empresa. "E entre as opcións máis viables que se estudaron atópase a de investir no país africano", aínda que sinalan que unha das barreiras é "a obrigatoriedade de ter a nacionalidade do país para ser propietario ou para fletar un buque local".
Este requisito, explican, establécese tamén para a dirección das empresas pesqueiras. "Isto provoca a necesidade de buscar fórmulas intermedias e unha delas podería ser a creación dunha sociedade matriz que teña entre os seus negocios a explotación dun barco, que si estaría dirixido polo 51% mauritano". Aínda que outra das opcións "é a posibilidade de crear unha 'joint-venture' con algunha empresa local de transformación de peixe xa existente".
O director xeral de Programas e Cooperación de Mauritania, unha vez exposto o informe, ofreceu "todo tipo de garantías para as empresas creadas con capital estranxeiro", segundo informa a Asociación de Armadores de Buques de Pesca de Marín.