A Audiencia Provincial de Pontevedra aprazou para maio o xuízo previsto para este martes contra dous irmáns acusados polo seu intento de descapitalización dunha empresa.
A sección cuarta da Audiencia viuse obrigada a tomar esta decisión por unha cuestión puramente xurídica, a citación de varias persoas xurídicas implicadas nesta causa.
Ante a falta de citación, é necesario volver sinalar o xuízo e convocalas formalmente para a vista oral. Finalmente, celebrarase os días 12, 14 e 19 de maio.
As partes si se presentaron este martes na Audiencia e durante dúas horas tentaron resolver todas estas cuestións xurídicas para poder celebrar o xuízo, pero finalmente concluíuse que a causa non podería chegar a xuízo con todas as garantías, de modo que optaron polo adiamento.
Os dous irmáns están acusados dun delito de frustración na execución en concurso de normas cun delito contra a Seguridade Social.
Están en cuestión unha serie de condutas encamiñadas a tratar de evitar, ou polo menos obstaculizar, que as súas acreeores puidesen satisfacer o seu crédito.
Xestionaban a empresa pontevedresa Comercial Senra e o fiscal do caso, Augusto Santaló, acúsaos de "actos de descapitalización das empresas do grupo familiar".
O obxectivo sería, segundo a acusación pública, que as sociedades eludisen o pago das débedas que tiñan cos seus acredores, tanto de públicos como de carácter privado.
O fiscal pide para cada un dos irmáns catro anos de prisión e o pago dunha indemnización de 1.417.690 á Seguridade Social e de 22.073.23 euros a unha das empresas acredoras.