O Partido Popular instalou este sábado unha carpa na Praza de Ourense para recoller sinaturas contra o indulto aos presos condenados no 'procés'.
Os populares tiveron que cambiar sobre a marcha os seus plans iniciais para non coincidir na Peregrina con outra carpa que tiña Vox, no que podería ser un anticipo do que ocorrerá na madrileña Praza de Colón.
Na carpa dos populares estaban a deputada nacional e vicesecretaria de Política Social do PP, Ana Pastor, a deputada autonómica Lupe Murillo, o portavoz municipal, Rafa Domínguez, a deputada provincial Pepa Pardo e a senadora Pilar Rojo, entre outras representantes do partido.
En declaracións aos xornalistas Ana Pastor acusou ao presidente do Goberno de España, Pedro Sánchez de facer "un autoindulto a sí mismo a cambio de permanecer en el poder" porque os políticos condenados a "los que va a indultar pertenecen a los partidos que están sustentando el Gobierno, separatistas e independentistas".
Por iso, fixo un chamamento á sociedade para sumarse á recollida de firmas co lema "Pola Constitución, pola Xustiza e por España".
A anécdota da xornada foi difundida por Rafa Domínguez na súa conta de Twitter, a sinatura "más especial" a protagonizou unha noiva que "minutos antes de pasar por el altar" estampou a súa rúbrica apoiando a petición do PP.
Ana Pastor tamén confirmou a súa presenza con "todos los ciudadanos de bien" na protesta que se celebrará o próximo 13 de xuño na Praza de Colón de Madrid "todas las personas del PP que podamos estaremos allí", sinalou a exministra.
Quen non acudirá é o presidente da Xunta e líder dos populares galegos, Alberto Núñez Feijóo, que aduce motivos de axenda para non acudir ao acto."Estará de la misma manera", apostilou Pastor sobre o mandatario autonómico.