O Partido Popular presentará unha moción no próximo pleno municipal denunciando a situación de abandono na que se atopa o complexo escultórico da Illa de Covo, tamén denominada Illa das Esculturas, situada na Xunqueira.
Ana Isabel Vázquez, concelleira popular, expoñía este venres que o Concello mantén abandonada unha exposición de referencia internacional e que, no seu momento, foi unha iniciativa imitada por outras cidades como Sevilla e debe ser un "orgullo para Pontevedra".
A representante do PP indicou que, desde a inauguración en xullo de 1999, foron continuos os episodios de denuncias sobre actos vandálicos contra as obras de artistas de talla mundial como Robert Morris, Richard Long, Dan Graham ou o cambadés Leiro. Ana Isabel Vázquez denuncia que estas escenas continúan producíndose, polo que demanda intervencións nesta contorna que axuden a poñer en valor este espazo.
As medidas solicitadas consisten en iluminar, principalmente as obras situadas na zona interior, para evitar ataques ás obras; identificar con placa todas as esculturas, xa que nalgunhas os vándalos borraron a denominación e o nome do artista; manter controlada a vexetación; crear un mapa con cada unha das esculturas que facilite as visitas turísticas coa opción de descarga en dispositivos móbiles; actualizar o web de Turismo de Pontevedra e outras institucionais con máis información sobre o complexo escultórico; e, por último, establecer un programa de visitas guiadas a este espazo ou a posta en marcha de aplicacións, con códigos QR, que permitan realizar un percorrido autoguiado con datos sobre as esculturas.
A concelleira popular lembrou que Xaquín Moreda, concelleira de Patrimonio, anunciara unha actuación de restauración da Illa a principios deste ano sen que se acometera aínda. Tamén indicou que o concelleiro de Deportes, Tino Fernández, presentou actividades deportivas nesta zona pero "nada que teña que ver co mantemento e seguridade do complexo".
Desde o PP entenden que é necesario establecer medidas para axudar a que este punto turístico "teña a importancia que debe ter para unha cidade que presume de ser importante no eido cultural. Non pode estar no estado en que está", sinalou Ana Isabel Vázquez afirmando que "non é boa imaxe para Pontevedra" e citou comentarios no sitio web Tripadvisor en que se critica o abandono destas obras creativas.
Lembrou que obras como o 'Laberinto' de Morris ou 'Una Folie' de Anne Houllevige & Patrick Poirier presentan pintadas e residuos no seu interior desde hai tempo sen que se procedera a súa eliminación.
Vázquez tamén avogou porque se realicen actuacións que conecten turisticamente diferentes espazos da cidade para realizar unha promoción en conxunto dos atractivos da cidade.