Ampla participación pontevedresa na manifestación en Compostela contra Altri

Milleiros de persoas inundaron este domingo as rúas de Santiago de Compostela para amosar o seu rexeitamento á instalación dunha macroplanta de celulosa en Palas de Rei, na provincia de Lugo, proxecto desenvolto por Greenfiber, filial da portuguesa Altri e a galega Greenalia.

Dende primeiras horas da mañá, cinco autobuses con residentes de Pontevedra, organizados pola Asociación pola Defensa da Ría de Pontevedra, a CIG e o BNG, desprazáronse á capital galega portando unha pancarta que rezaba: "Nin Ence na ría, nin Altri na Ulloa. Celulosas fóra!"

Antes do inicio da marcha, os presidentes da Plataforma Ulloa Viva, Marta Gontá, e da Plataforma en Defensa da Ría de Arousa (PDRA), Xaquín Rubido, organizadores da marcha, denunciaron o modelo industrial da Xunta, advertindo que o proxecto ameaza o corazón natural de Galicia.

Rubido sinalou que a Xunta "carece de lexitimidade para impoñer este modelo produtivo" e alertou sobre o impacto en milleiros de familias dos sectores agroganadeiro, mariñeiro e turístico.

A manifestación, convocada baixo o lema "A Xunta non pode calar a todo un país. Altri Non!", contou co apoio de forzas políticas da oposición, organizacións sindicais, sociais e ambientalistas.

Entre as consignas máis coreadas destacaron "Se é tan boa que a leven á Moncloa" e "Rueda, recula, a auga non é túa".

A portavoz nacional do BNG, Ana Pontón, presente na mobilización, esixiu ao presidente da Xunta, Alfonso Rueda, "que pare esta agresión, esta bomba ambiental que é unha hipoteca para o futuro do noso país".

Pola súa banda, Altri defende nun comunicado o seu proxecto, aínda pendente de autorización técnica, lamentando a "percepción negativa" de parte da sociedade e asegurando que o deseño cumpre "cos máis altos criterios de sustentabilidade, circularidade e respecto ao medio ambiente" esixidos pola normativa europea.

A manifestación, que segundo os convocantes reuniu a 100.000 persoas, rematou diante da sede da Xunta de Galicia, onde os manifestantes corearon "Altri non" nun ambiente festivo e reivindicativo sen incidencias.